ИлСаф: "Кызым вафат булгач, дин коткарды"

— Мәчетләрдә хәзрәтләр еш кына: “Дингә авырлыклар булганчы килегез”, — дип әйтә. Хәзер үзем дә шулай дип киңәш бирәм. Мин исә дингә авырлыклар аша килдем. Беренче никахтагы кызым Айгөл авырый башлагач, мәчеткә йөрергә тотындым, намазга бастым. Кызым вафат булгач, дингә килүем генә коткарды. Намазларым булмаса, депрессиядән чыга алмас идем кебек. Җырлау турында әйткән дә юк. Өч еллап томан эчендә яшәдем. Минем алда ике юл бар иде — йә югалырга, яки кызым истәлегенә аякка басарга. Аллаһы Тәгалә миңа шушы кайгыларны күтәрергә көч бирде. Дөрес, гаиләне саклап калып булмады. Беренче гаиләмдәге олы кызым белән дә бик җылы мөнәсәбәттә, оныгым да бар. Икенче никахымда ике улым — Җәмил белән Аяз үсеп килә.