«Абага чәчәге» фильмында төп геройны кем уйнаячагы билгеле булды (ФОТО, ВИДЕО)

«Татаркино»да танылган татар шагыйре, язучы һәм драматург Ркаил Зәйдулла әсәрләре нигезендә төшереләчәк «Абага чәчәге» фильмына кастинг узды. Картинаның сценарий авторы һәм режиссеры – Салават Юзеев. Фильмның продюсеры – Миләүшә Айтуганова, кастинг-директоры – Ирек Хафизов.

Кастингта икенче пландагы рольләрне башкаручыларны, шул исәптән төп геройның яшь дуслары һәм ахирәтләре роленә актерларны сайладылар. Сынауларда Казан театр училищесы студентлары да катнашты. Татар телен белү мәҗбүри шарт иде. Режиссер Салават Юзеев кастинг-директор Ирек Хафизов белән берлектә, геройларның характерыннан чыгып, типларга максималь дәрәҗәдә туры килгән актерларны сайлады, персонажлар арасында кирәкле «химия» булдыру өчен артистларның үзара ничек хезмәттәшлек итүен күзәтте.

Картинаны төшерү Татарстанның Балык Бистәсе районында узар дип планлаштырыла. Актерлар составы әле формалашып кына килә, әмма фильмда төп рольне Татарстанның халык артисты, Әлмәт татар дәүләт драма театры артисты Рафик Таһиров уйнаячагы билгеле.

«Ркаил Зәйдулла әсәрләре ачык эмоцияләр белән белән сугарылган, аларда бүгенге көн каршылыклары, чын һәм ялган кыйммәтләр проблемасы күтәрелә. Бу фильм сюжеты һәм анда күтәрелгән темалар белән тамашачыга якын булыр һәм аның күңелен яулар дип ышанам», – дип картина продюсеры Миләүшә Айтуганова.

Картинада хәзерге чынбарлык фонында яхшылык һәм яманлык, тугрылык, гаделлек һәм шәфкатьлелек, мәкерлек һәм кылынган явызлык өчен җәзаның котылгысызлыгы кебек мәңгелек темалар яктыртылачак. Сюжет буенча, хәрби бурычын үтәгәндә яраткан кешесен югалткан яшь Алиянең бәхеткә барыр юлы катлаулы, хәтта трагик сынаулар белән тулы булачак.

Фильм Татарстан Республикасының «Татар халкының милли үзенчәлеген саклау» дигән дәүләт программасы кысаларында иҗат ителә. Республикада татар әдәбияты классикларының әсәрләре буенча «Мулла», «Ак чәчәкләр», «Тапшырылмаган хатлар», «Остазбикә», «41 нче ел балалары», «Гашыйклар тавы», «Әниләр һәм бәбиләр», «Тарлан», «823 нче километр» фильмнары төшерелде инде.