Татарстанда чәчү кампаниясе төгәлләнеп килә

Татарстан Республикасында чәчү кампаниясе ахырына якынлашып килә. Сабан культуралары 1 млн. 611 мең га мәйданда чәчелгән, бу - планнан 94%.

Мондый белешмәләрне бүген Татарстан Республикасы Хөкүмәте Йортында узган гадәттәге шимбә киңәшмәсендә Татарстан Республикасы авыл хуҗалыгы һәм азык-төлек министры урынбасары Дмитрий Яшин җиткерде.

Республиканың барлык муниципаль районнары белән видеоконференцэлемтә режимындагы киңәшмәне Татарстан Премьер-министры Алексей Песошин уздырды.

Дмитрий Яшин әйтүенчә, җылылыкны күбрәк яратучы культуралар: кукуруз - 15 мең га, соя – 1,9 мең га, карабодай – 3,6 мең га чәчелгән, бәрәңге һәм яшелчәләр утырту тәмамланып килә. Алты районда сабан культураларын чәчүне төгәлләгәннәр. Башка районнарда да якын арада бу эшләр төгәлләнәчәк.

Агымдагы елда, узган елдан калган азык запасларын исәпкә алып, 3,2 млн тонна сенаж, 3,7 млн тонна силос һәм 320 мең тонна печән әзерләргә кирәк булачак. Кышлауга ел ярымлык азык запасы белән керергә кирәк, бу шартлыча бер баш терлеккә 40 центнер туры килә. Бүген 11 районда терлек азыгы әзерләү башланды. 23 мең тонна сенаж һәм 2,5 мең тонна печән әзерләнгән. Күчмә азык запасы республика буенча бер башка уртача 22 ц. тәшкил итә.

Республика хуҗалыкларында 710 бер. азык җыю комбайны бар. Республика буенча тәүлеклек азык әзерләү куәте - 127 мең тонна. Комбайннардан тыш, хуҗалыкларда 500 бер. үзйөрешле һәм 1300 бер. тагылма чапкыч, 1800 бер. пресс-җыйгыч һәм 360 транспортировщик бар. Иң югары йөкләнеш чорында куәтләрне көчәйтү өчен башка төбәкләрдән механикалаштырылган отрядларны җәлеп итәргә мөмкин, дип билгеләп үтте нотыкчы.

Киңәшмә барышында хәбәр ителгәнчә, 2026 елның 3-4 июнендә Минзәлә районында «Камский Бекон» ҖЧҖ базасында терлек азыгы җитештерү буенча Федераль Кыр көне узачак. Чарада агросәнәгать комплексының әйдәүче экспертлары, агробизнес вәкилләре, Россия һәм чит ил галимнәре һәм технологлары катнаша. Чарада төп тем буларак, терлек азыгы җитештерүнең заманча технологияләре һәм терлекчелекне үстерү өчен нәтиҗәле чишелешләр каралачак.

РТ Рәисе матбугат хезмәте материаллары буенча