Сәйдәш музее яңа мәдәни-агарту программаларын тәкъдим итәчәк

1 июньдә Салих Сәйдәшев һәм татар музыкасы музее яңа мәдәни-агарту программалары тәкъдим ителәчәк. Музейда йорт хәтеренә, анда яшәүчеләргә һәм татар музыка мәдәнияте тарихына багышланган лекцияләр, спектакль-променад һәм төнге экскурсия узачак.

Кичәнең исеме – «Монда иҗат туды: тулай торак бүлмәләреннән музыка залларына кадәр» – кайчандыр Татарстанның күренекле мәдәният әһелләре яшәгән, эшләгән һәм сәнгать әсәрләре тудырган урын тарихына ишарәли.

Башта «Винил атналыгы» лекцияләр циклы ачылышы була. Кунаклар музейның яңартылган винил пластинкалар каталогы белән танышачак, җылы мохиттәге әңгәмәләрдә катнашачак.

Аннан соң «Пәрдә күләгәсендә» спектакль-көндәлеге була. ТАССРның беренче профессиональ театр тәнкыйтьчесенә әверелгән 13 яшьлек кыз көндәлеге текстлары буенча куелган иммерсив спектакль күрсәтелә. Тамаша музейның барлык экспозиция залларында узачак, ә финал күренеше чәй табыны янында тәмамланачак.

Соңрак «13нче йортта яшәүчеләр» музей экспозициясе буенча төнге экскурсия. Ринат Таҗетдинов, Рауза Хәйретдинова, Марсель Сәлимҗанов, Альфред Сәйдәшев – музей язмышлары әлеге йорт белән бәйле булган кешеләрнең истәлекләрен туплады. Бу урын тарихы музей экспозицияләрендә генә түгел, ә кайчандыр монда яшәгән кешеләр турында тере хәтер булып та саклансын өчен эшләнде.

Кичә дәвамында музей хезмәткәрләре яңа лекция һәм концерт программалары, планлаштырылган спектакльләр һәм күргәзмәләр, музыкаль салондагы концертлар циклы кысаларындагы хезмәттәшлек мөмкинлекләре турында сөйләячәк.

Чара ябык форматта була.

Зилә Мөбәрәкшина

Татар информ