Кытайга тимер юл буйлап җитен һәм борчак партияләре җибәрелде

«Август-Агро» идарәчел компаниясе Кытайга тимер юл буйлап беренче җитен һәм борчак партияләрен җибәрде. Шушы көннәрдә «Бер пояс һәм бер юл» контейнер терминалыннан 1600 тоннага якын продукция белән контейнер поездлары кузгалып китте.

Составлар Казахстан аша транзит белән Тяньцзинь станциясенә кадәр барачак.

Элегрәк компания продукцияне диңгез буйлап көньяк портлар аша экспортлый иде. Тимер юл буйлап ташуга күчү логистик чыгымнарны, Новороссийск маршруты белән чагыштырганда, 10%ка киметергә мөмкинлек бирде, дип хәбәр итте «Август-Агро» ИК коммерция бүлеге башлыгы Әмир Галәүтдинов. Урынга илтеп җиткерү сроклары да кыскарачак: поездлар билгеләнгән урынга бер ай эчендә барып җитәчәк, дип көтелә, ә диңгез юлы буйлап кимендә өч айга сузыла.

Әмир Галәүтдинов әйтүенчә, Кытай ягы баштан ук тимер юл логистикасына басым ясаган. Ә маршрутны Россия тимер юлы белән килештерү өч айга сузылган. Казахстан аша транзитны сайлау геосәяси факторларга һәм инфраструктура йөкләнешенә бәйле иде.

Экспортлана торган җитен һәм борчак Мөслим һәм Лениногорск районнарында «Август-Агро» агрофирмаларында үстерелгән. Продукцияне экспортка әзерләүне һәм контейнерларны оператив тутыруны холдинг предприятиеләре: «Август-Мөслим» һәм «Август-Лениногорск» икмәк кабул итү пунктлары тәэмин иткән.

Үзара файдалы мөнәсәбәтләр партнерлыкны ныгыта һәм «Халыкара кооперация һәм экспорт» илкүләм проекты максатларына туры килә.