Казанда Татарстанның кино тарихына багышланган күргәзмә ачыла (ФОТО)

18 майда «Татаркино» бинасында «Татарстан кинематографиясе тарихы» дип аталган экспозицияне тәкъдим итү чарасы узачак. Бу мәйданчыкта тамашачылар милли кино җитештерү һәм кинопрокат үсешенең беренче адымнарыннан алып бүгенге казанышларына кадәрге тарихы белән таныша алачак.

Тиздән биредә мәктәп укучылары һәм студентлар өчен кинодәресләр дә үткәрелә башлаячак.

2024 елның февралендә Татарстан кинематографиясе үзенең йөз еллыгын билгеләп үтте. «Татаркино»ның ул вакыттагы директоры Миләүшә Айтугановага Татарстандагы киноиндустрия белән бәйле барлык оешмаларның эшчәнлеген бергә туплаучы экспозиция булдыру идеясе нәкъ шул чакта килә дә инде.

Күргәзмәнең нигезен кинопроекторлар, камералар, китаплар, документлар һәм борынгы афишалар тәшкил итә. Монда килүчеләр 50нче, 60нчы, 70нче еллардагы фоторәсемнәр белән тулы зур фотоальбомнарны күрә алачак. Нәкъ менә Казан кинохроника студиясенең дә альбомы табылды. Казанның күп кенә өлкән яшьтәге халкы СССР вакытында «Вузовец», «Дружба», «Комсомолец» һәм башка кинотеатрларга йөргәннәрен әле дә хәтерли.

Аерым бер стенд исә Татарстан режиссерлары иҗат иткән хроникага һәм фәнни-популяр фильмнарга багышланган.

Фотоальбомнарның берсе киночаралар кунаклары турында сөйли. Казанга иҗади очрашуларга Александр Белявский, Леонид Быков, Л. Чурсина, Александр Демьяненко, Раднер Муратов, Станислав Любшин, Всеволод Санаев, Николай Озеров, Георгий Бурков, Игорь Старыгин, Алексей Баталов, Татьяна Догилева, Маргарита Терехова, Нонна Мордюкова, Надежда Румянцева кебек танылган актерлар, режиссерлар Наталья Бондарчук, Марк Донской һәм башка бик күпләр килгән иде.

Кино тармагының хәзерге эшчәнлеген соңгы 20 елда төшерелгән дистәләгән фильмнарның афишалары, шулай ук «Татаркино» һәм Казандагы бердәнбер дәүләт кинотеатры булган «Мир» эшчәнлеген чагылдыручы стеллажлар күрсәтә.

Экспозициянең зур өлешен «Алтын минбәр» Казан халыкара кинофестиваленең 20 еллык тарихы алып тора.

Күргәзмәне ачуда Татарстан Республикасы Кинематографистлар берлеге әгъзалары катнашачак. Быел әлеге оешма үзенең 45 еллыгын бәйрәм итә.