«Алтын минбәр» фестиваленә гаризалар 1 июньгә кадәр кабул ителәчәк

4-8 сентябрьдә Татарстан башкаласында XXII «Алтын минбәр» Казан халыкара кинофестивале үтәчәк. Ел саен әлеге кинофорум кысаларында танылган режиссерларның иң яхшы фильмнары күрсәтелә.

Иң яхшы тулы метражлы нәфис фильм, документаль һәм анимацион фильм номинацияләре белән беррәттән, «Алтын минбәр» фестивале “Иң яхшы милли фильм”нарны да сайлап ала.

«Алтын минбәр» Казан халыкара кинофестиваленең Милли конкурсы – Татарстанда төшерелгән, республика турында сөйләүче яки республика катнашында иҗат ителгән фильмнар өчен махсус программа. Гаризаларның күплеген һәм тәкъдим ителгән эшләрнең югары сыйфатын исәпкә алып, узган елны фестивальнең оештыру комитеты милли кино программасын киңәйтергә карар кылды. Нәтиҗәдә, Милли конкурс кысаларында элеккечә ун түгел, ә ундүрт фильм тәкъдим ителде.

Милли конкурсның төп номинацияләре: “Иң яхшы милли фильм”, “Иң яхшы милли документаль фильм”, “Иң яхшы милли кыска метражлы фильм”, “Балалар өчен иң яхшы милли фильм”. Быел беренче тапкыр “Иң яхшы милли сериал”ны да сайлаячаклар.

«Бу безнең кинематографистлар тарафыннан төшерелгән сериаллар гына түгел, ә Татарстанга, Казанга, безнең халыкка һәм аның мәдәниятенә багышланган проектлар (документаль сериаллар яки биографик картиналар) булуы да мөһим. Татар телендәге традицион милли сериаллардан тыш, без вертикаль сериаллар, веб-сериаллар һәм башка форматларны да кабул итәбез. Бүгенге чорның рухына туры килә торган, кинопроизводстводагы үзгәрешләргә игътибар итәргә мөмкинлек бирүче заманча ресурс. Бүген мондый категорияне кертү тулысынча акланган һәм үз вакытында эшләнгән адым», – ди «Алтын минбәр» фестиваленең башкарма директоры Миләүшә Айтуганова.

Узган кинофестивальдә режиссерлар Ирек Хафизов һәм Юлия Захарованың “Дочки-матери” картинасы “Иң яхшы милли фильм” дип танылды. “Иң яхшы милли документаль фильм” – режиссер Анна Баязитованың “Русалки” тасмасы, “Иң яхшы кыска метражлы фильм” – режиссер Александр Далматовның “Кеше китә – җыры кала” фильмы булды. “Балалар өчен иң яхшы милли фильм” номинациясендә приз режиссер Наталья Нилованың “Туган Батыр” проектына тапшырылды.

Конкурста катнашу өчен гаризаны 2026 елның 1 июненә кадәр җибәрергә яки фестивальнең рәсми сайтында махсус анкетаны тутырырга кирәк. Конкурс программасында 2024 елдан да иртәрәк чыкмаган фильмнар гына карала.