«Өстебездә ни бар — шуның белән калдык...»: Казанда янгыннан соң ятим бала белән әбисе йортсыз калган

Казанның Залесный бистәсендә яшәүче Диләрә Галимҗанова гаиләсе өчен 6 май көне кайгыга әйләнгән.

Кич белән чыккан янгын аларның йортын тулысынча көл иткән. Берничә дистә ел буе төзелгән, җыелган тормыш мизгел эчендә юкка чыккан.

– Бу йортта мин туганнан бирле яшәдем. Әтием төзеп калдырган нигез иде. Инде миңа 56 яшь. Соңгы елда монда бары оныгым белән генә яшәдек. Кызымны 5 ай элек югалттым, оныгым ятим калды. Кайгы өстенә кайгы килде, – ди Диләрә ханым.

Янгын чыккан вакытта ул эштә булган. Осиноводагы кошчылык фабрикасында сменада чакта аңа коточкыч хәбәр җиткерәләр:

– 18:15тә оныгыма шалтыраттым. “Барысы да әйбәт”, – диде. “Тиздән кайтып җитәм”, – дип телефонны куйдым. Ә 45 минуттан соң эш урыныма килеп: “Өең янып бетә”, – диделәр...

Йортта ул вакытта аның Казандагы 57 нче мәктәпнең 3 сыйныфында укучы оныгы Р. булган. Бәхеткә, ул йортның икенче өлешендә дусты белән уйнап йөргән. Утны күргән күршеләр өйгә йөгереп кергәннәр, документларны алып чыкканнар, янгын сагын чакырганнар һәм баланы табып чыгарганнар.

– Күршеләр әйтүенчә, ялкын бөтен йортны мизгел эчендә камап алган. 85 квадрат метрлы йорт иде. Аш-су бүлмәсе, өч бүлмә, терраса... Пианино, телевизор, суыткыч, газ плитәсе – бөтен гомер буе җыйган мал көлгә әйләнде, – ди Диләрә апа.

Хәзер гаилә өстендәге кием белән генә калган. Янгынның сәбәбе әлегә рәсми билгеле түгел, әмма электр үткәргечләрендәге төзексезлек фаразлана.

Бу авыр көннәрдә кешеләр ярдәм кулын сузган. Оныгы укыган 57 нче мәктәп коллективы һәм әти-әниләр кием-салым, урын-җир, савыт-саба белән ярдәм иткән.

– Аларга рәхмәтем бик зур. Оныгыма киемнәр алып килделәр. Безне ялгыз калдырмадылар, – ди Диләрә ханым.

Әмма алда әле зур сынау тора. Янгын яңа төзелә башлаган йорт өлешенә күчмәгән. Хәзер шуны төзеп бетерү – гаиләнең бердәнбер өмете.

Фаҗига кичендә бистә халкы бердәм булып ярдәмгә килгән. 

Янгын берничә минут эчендә кешене бөтен тормышыннан мәхрүм итә ала. Бүген Диләрә ханым белән аның ятим оныгы кешеләр ярдәменә, җылы сүзгә һәм терәккә мохтаҗ. Әмма мондый чакта кешенең кешегә терәк булуы аеруча мөһим. Хәзер Диләрә ханым һәм аның оныгына яңадан тормыш башларга кирәк: йорт төзисе, көнкүреш әйберләре аласы бар.

Залесный бистәсендәге гаиләгә ярдәм итәргә теләүчеләр өчен элемтә телефоны:
8 903 062 46 47 ( Сбербанк) Диляра Саетовна Галимзянова дип чыга.