Шәмсия Җиһангирова: "Бер кем белән дә узышмыйм" (ФОТО)

— Хатын-кыз кияүгә чыкса, гашыйк булса яшәреп китә. Ләкин мин икесеннән дә соңга калдым (көлә). Ирем Назыйм үлгәнгә 33 ел булды. Яңадан кем беләндер кушылып бәхетле булу турында хыялланмыйм. Әле бит бәхет төшенчәсен кем ничек аңлый. Мин үземне бик бәхетле кешегә саныйм.

Матураеп китәргә, шатланырга сәбәпләр табылып тора. Бер шигырь язылса яки помидор шытып чыкса да, сабый кебек сөенәм. Күптән түгел “Гамәл китабы” дип исемләнгән 500 битле шигырьләр җыентыгы чыкты. “Мәхәббәт бизмәне” дигән проза җыентыгы әзерләнеп ята. Ул да 500 битле булачак. Кемдер моңа, бәлкем, көнләшер. Тик мин беркем белән дә узышмыйм. Гомер-гомергә үз көемә, үз җаема яшим, иҗат итәм. Дистә еллар дәвамында китапларым басылмады. Моның сәбәпчесе дә үзем. Теләнеп, соранып йөрисем килмәде.

 

 

.