Күршем биек койма корды, мин ризалык бирмәдем...

Күршем ике арага профнастилдан биек койма корды, хәзер безгә кояш та төшми, һава да керми. Мин ризалык бирмәдем. Аны сүттерергә мәҗбүр итеп буламы? Мәдинә, Биектау.

Сорауга адвокат Марат Гайнуллин җавап бирә: 

– Мондый очракта койманың сезгә нинди зыян китерүенә бәйле.
Биек койма урам ягыннан корылса, гадәттә бу закон бозу дип саналмый. Ә менә күрше участоклар арасында ул проблемага әверелергә мөмкин.

Кагыйдә буларак:
— күршеләр арасындагы койма яктылык һәм һава үткәрергә тиеш;
— тәкъдим ителгән биеклек — 1,2-1,8 метр;
— биек койма бары тик күршеләрнең ризалыгы белән корылырга тиеш.

Кайчан койманы сүттерергә мөмкин?
Судка мөрәҗәгать итәргә нигез бар, әгәр:
— коймадан участокка күләгә төшсә (үсемлекләр үсми);
— вентиляция начарайса;
— сезнең җирдән файдалану мөмкинлеге кимесә.

Әгәр бу фактлар исбатланса (фото, экспертиза һ.б.), суд койманы сүтәргә яки үзгәртергә мәҗбүр итә ала.

Әгәр зыян исбатланмаса?
Сезнең ризасызлыкларыгыз һәм “миңа бу ошамый” дигән сүзләрегез белән генә койманы сүттереп булмый. Нормалар күбесенчә киңәш характерында, һәм реаль зыян булмаса, суд дәгъваны кире кагарга мөмкин.
Шәхси торак секторы яки шәхси йорт булса?

Бу очракта биек койма кору турыдан-туры тыелмый, әмма җирле кагыйдәләр (муниципалитет) эшли. Гадәттә биеклек 2 метрга кадәр рөхсәт ителә, ләкин күршегә зыян китермәү — төп шарт.

Нишләргә?
Башта күршегез белән сөйләшеп карагыз.
Ризалык булмаса — хокук бозуны теркәгез (фото, видео).
Администрациягә яки судка мөрәҗәгать итәргә мөмкин.
Койма үз җирендә булса да, күршегә зыян китерсә, сүттерергә мәҗбүр итәргә мөмкин. Әмма моның өчен реаль дәлилләр кирәк.

Фото: Татар-информ