"Картада булган акча уенчык сыман гына тоела, тиз бетә": җырчыларыбыз акча тота беләме?

17 апрель – Халыкара акча көне. Яраткан җырчыларыбыз акчаларын кайда саклый? Кибетләргә еш йөриләрме? Акчаны күп итеп җыю яклымы алар? Хәзер барысын да ачыкларбыз.

“Акчаны өйдә сакламыйм. Безнең барысы да әйләнештә, киләчәк өчен тырышабыз. Кибетләргә еш йөрергә яратам, бүгенге белән яшим. Әлегә запас акча җыймыйм”,– дип елмая Алсу Фазлыева.

“Беренче чиратта, акча – минем өчен энергия, ә аның уңаймы-тискәреме икәнбеләне бары кешенең үзеннән тора. Шуңа күрә үз-үзеңне карарга кирәк: сәламәтлек, йокы, дөрес туклану, ял, спорт, массаж... Барысы да мөһим. Акча да сәламәт, уңай кешеләрне ярата”,– дип сүз тотты Гөлназ Яхина. Шулай ук җырчы кибетләргә йөрергә яратуын да ассызыклый. “Нәрсә дә булса сатып алу – минем өчен дофамин. Еш булмаса да стилист белән киенәм, рациональ рәвештә акча туздырырга яратам”,– дип белдерә ул.

“Миңа акчаны сакларга урын кирәкми: ул тиз генә керә дә, чыгып та китә”, - дип елмая Байбулат. “Акчаны җыйган бар, әмма еш кына нәрсәгәдер булса көтмәгәндә чыгып китә ул. Кирәк әйберләр барлыкка килеп кенә тора. Тик шулай да алга таба акчам җыелыр дип өметләнәм, моның өчен тырышлыгымны куям, тиешле юнәлештә эшлим”,– дип үз фикере белән бүлешә алып баручы һәм җырчы.

Рамил Закиров акчаны күбрәк кәгазь вариантта сакларга ярата, яки берәр сумманы процентсыз счетка салып куя. Соңгы ике елда исә аның бөтен акчасы диярлек яңа йортка кереп бара икән: “Ремонт, кирәк-яраклар алу белән акча бетеп бара. Кибетләрдән килде-китте нәрсәләр алып йөргән юк хәзер”,– дип бүлешә җырчы һәм “куркынычсызлык мендәре” сыман бераз җыелган акча булырга тиеш икәнен дә ассызыклый.

Илсур Шәрипҗанов картада акча тотарга шулай ук яратмый булып чыкты. “Аны салдырып, мендәр астында саклавың хәерлерәк. Картада булган акча уенчык сыман гына тоела, тиз бетә ”,– дип бүлешә гаилә башлыгы. “Хәзер кибеткә кереп ипи-сөт алырга бер мең сум акча китә, продукция исемлеген арттырсаң, биш меңгә дә тулырга мөмкин. Әйберләр кыйммәт хәзер. Маркетплейслардан да кирәкмәгән нәрсә җыеп утырган юк”,– ди иртәгесе көнне уйлап яшәү һәм булган акчаны тиз генә тотып бетерү яклы җырчы.