"Араларында мәхәббәт икән, диләр"

— Артур, композитор Гүзәлия белән дуэтларыгыз тамашачыга зур яңалык булды, җылы кабул итәләр. “Гүзәлия белән Артур бергә икән”, — дип берләштереп тә куярга өлгерделәр сезне.
 

— Гүзәлия белән күптән танышлар без. Ул — бик көчле музыкант. Аңа нык рәхмәтлемен! Арабызда бернәрсә юк, без — дуслар. Бу — иҗадый эш процессы. Мәхәббәт турында, “сине сагындым” дип җырлап дуэтлар башкарабыз икән, әлбәттә, артист буларак, мин Гүзәлиягә карап җырлыйм. Сәхнә бит образга керүне дә сорый. Таныш түгел апалар яныбызга килеп: “Сез бер-берегезгә бик туры киләсез”, — дип әйтәләр. “Рәхмәт”, — дибез инде. “Икәү бергә яшисезме әллә?” — дип тә сораучылар бар. “Юк”, — дип матур итеп аңлатабыз.

Аллаһка шөкер, гаиләм бар, тигез, матур яшибез. Хатыным Луиза белән тормыш итә башлаганга 26 ел булды. Очрашуларыбыз белән 30 елга җыела. Институт елларыннан бергә без.