ТНВ журналисты Нәфисә Минәҗеваның кызына эт һөҗүм иткән (ФОТО)

Кешеләргә этләр һөҗүм итүләр әледән-әле булып тора. Кыргый этләр дә талый, кайвакыт өйдәгеләре дә ябыша. Кичә ТНВ каналындагы хәбәрләр хезмәте журналисты Нәфисә Минәҗеваның 12 яшьлек кызы этләр һөҗүменә дучар булган. Бу турыда ул “Матбугат.ру”га үзе сөйләде.

Куркыныч хәл Биектау районы Шигали авылында килеп чыккан. Әлеге җирлектә бу инде беренче генә очрак түгел. Әмма элек сукбай этләр ташланган булса, бу юлы хуҗалы эт. Шактый зур гәүдәле немец овчаркасы башта Нәфисәнең 4 яшьлек һәм 2 яшьлек кызларына ыргыла. Аларны Нәфисәнең 12 яшьлек кызы коткармакчы була. Нәфисә үзе балаларны машинадан чыгарган да аны парковкалау белән мәшгуль булган. Шушы мизгел эчендә эт һөҗүм итәргә өлгерә.

Соңыннан эт тагын бер яшүсмер малайга ташлана. Бу хәлләрне олылар күреп ала һәм эткә утыннар ыргытып, балаларны коткаралар. Аллага шөкер, тән җәрәхәтләре алучылар юк. Әмма киемнәргә зыян килгән. Фотодан күренгәнчә, Нәфисә кызының өске киеме ертылып беткән. Бәлки, шушы куртка этнең тешләреннән саклап калгандыр да аны.