Динара Рахматуллина: “Иреңнең фамилиясен алгач, кулга балдак кигәч рәхәт икән”

Җырчы Ринат Рахматуллин хәләле Динара белән язылышкан. Моңа кадәр алар никах белән яшәде.

Моннан ике ел элек әңгәмәдә Ринат Рахматуллиннан мөнәсәбәтләрне рәсмиләштерү турында сорагач: “Туйлар ясап тормасбыз инде. Динара Рахматуллина булырга тиеш инде. Концертларны яхшы гына эшләп чыккач, Аллаһ бирса, хәстәрләрбез. Башта дөнья миңа ышансын инде. “Рахматуллин, чыннан да, башка кеше икән”, - дигән сүзләрне аклыйсым килә”, – дигән иде. Җырчы сүзендә торды, димәк. Динара Рахматуллина безнең белән дә хис-кичерешләре белән уртаклашты.

– Динара, котлыйм! Ниһаять, сине Динара Рахматуллина дип язарга була. Шулай да рәсми рәвештә мөнәсәбәтләрне теркәү сузылды. Ни өчен?
– Безнең өчен беренче урында никах иде. Никах булгач, язылышу турында уйламадык та. Дөресен әйткәндә, эш тә күп иде, вакыт та булмады. Бәлки, бу сүзләр аклану кебек тә яңгырар. Кирәк дип тапсак, җаен табар идек, димәк, ул вакытта бу адымны ничектер кичектереп торганбыз. Хәзер инде бергә яшәвебезгә 2 ел булды. “Язылышырга кирәктер”, – дигән нәтиҗәгә килдек. Ринат язылышу турында гел әйтә иде. Барырга җаебыз чыкмады. Ринатка блефаропластика ясагач, бераз вакыт бушады, шулай итеп гариза биреп кайттык.

– Рәсми рәвештә хатын булу нинди хисләр уята?
– Иреңнең фамилиясен алгач, кулга балдак кигәч барыбер рәхәт икән.  Язылышкач, хатын-кызны башкача кабул итәләр. Мөнәсәбәтләребез болай да җитди иде, әмма алар башка дәрәҗәгә күтәрелде дигән сүз.

– Мин сине ак күлмәктә күрермен дип уйлаган идем. Ак күлмәкле туйны күрәчәкбезме?
– Ак күлмәк кию турында уйлаган идем. Ләкин тыйнак кына язылышасы килде. Ак күлмәк киюдән генә безнең хисләр үзгәрми, иң мөһиме – гамәлләр. Икенче яктан, беренче тапкыр кияүгә чыкмыйм бит. Туй ясауның мәгънәсен күрмим. Минем өчен аның кызыгы да юк.