2 мартта ТНВ каналында «Ай булмаса, йолдыз бар» сериалы күрсәтелә башлый (кадр артыннан ФОТОлар)

БАШ“Ай булмаса, йолдыз бар” сериалында вакыйгалар 2010-2025нче елларда бара һәм безнең буын кешеләренең тормышы көчле рухлы Мәдинә язмышы аркылы күрсәтелә.

Язмыш тарафыннан бер-бер артлы аяусыз сынауларга дучар булган Мәдинә яшәү дәртен югалтмасмы? Хыянәт һәм үлем китергән хәсрәткә каршы чара бармы?

Сериалда көндәлек темалар белән беррәттән татар гаиләсен, телен саклау мәсьәләләре дә күтәрелә. Туфан Миңнуллин әсәренә нигезләнгән яңа телепроект мәшһүр драматургның тууына 90 ел тулуга багышлана. Сериалның режиссеры - 2025 елның ике мөһим премьерасы - Мөхәммәт Мәһдиев повесте буенча төшерелгән “Кеше китә - җыры кала” телесериалын һәм Нурихан Фәттах әсәре нигезендә “Кырык дүртнең май аенда” фильмын чыгарган, гомумән, бүген татарның иң билгеле кинорежиссерына әйләнгән Александр Далматов.

Сценарий авторлары - режиссер үзе һәм Алсу Хәбибуллина. Сериалны төшерә торган команда бу юлы да үзгәрешсез калды: куючы оператор Максим Самсонов, икенче режиссер ролендә Илмир Хәбибуллин, рәссамнар командасында Сәлимә Әминова, Фирүзә Зиннәтуллина һәм Алсу Кадыйрова.

Сериалны Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәмендә “Татарстан - Яңа гасыр” каналы белән берлектә “Ватан 21 гасыр” кинокомпаниясе төшерде.

Сериалда Мәдинә ролен Әлмәт татар дәүләт театры артисты Диләрә Фазлыева башкара. Мирзанур ролендә - К.Тинчурин ис. Татар дәүләт драма һәм комедия театрыннан Артем Пискунов, ә автор ролендә - Камал ис. Татар дәүләт академия театры артисты Алмаз Борһанов.

Сериал 2 марттан 20.00 сәгатьтән ТНВ каналында көрсәтелә башлый.

Төшерү процессының кайбер мизгелләре: