Илсөяр Иксанова: "Ул вакытта миңа — 26, аңа 36 яшь иде" (ФОТО)

— Илдар белән авылдашым Розаның туган көнендә таныштык. Ул вакытта бик модада булган парча күлмәгем белән ялтырап килеп кергән идем. Илдар мине биергә чакырды. Азатлык яулап, мәйданнарда йөргән 1990 еллар бу. Милләт, тел турында кызып-кызып бәхәсләштек, ахырдан гына белдем, аңа мине “кыздыру” кызык булган икән; дусларына: “Бәхәсләшкәндә зәңгәр күзләре тәлинкә кадәр була”, — дип сөйләгән. Ул мине ошатып калган, ә мин: “Ачу китергеч бер кеше бар иде”, — дип кайтып киттем. Май ае иде бу. Аннан Яңа елны каршылаганда очраштык. Анда инде “ачу китергеч”нең бик тә мөлаем, тирән белемле, гаҗәп кызыклы кеше булуын аңладым. Ул вакытта миңа — 26, аңа 36 яшь инде. Озаклап очрашып йөрергә вакыт та, теләк тә юк: эзләгәнебезне тапканны аңладык. Тауларга да алып менде, ташкын суларга да алып төште — “сплав”ларны әйтүем.

 

Бергә яшәргә насыйп булган кыска гына гомердә шатлыгын да, кайгысын да күреп өлгердек: өч айлык улыбыз Наилне югалттык.