Бөгелмә һәм Чаллыда “Кара урман” фильмы күрсәтелде (ФОТО)

10 февральдә Бөгелмә һәм Чаллыда Радик Кудояров төшергән «Кара урман» фильмының премьера алды күрсәтүләре булды. Күрсәтүләр программасына төп рольләрне башкаручылар белән очрашулар да кертелгән иде. “Кара урман” фильмында Муса Җәлил образын Тинчурин театры артисты Зөлфәт Закиров уйнаган.

Зөлфәт Закиров өчен Муса Җәлил роле күптәнге хыялын тормышка ашыру булган. «2023 елда бу хыялым тормышка ашты», – дип тамашачылар белән үз шатлыгын уртаклашты Зөлфәт Закиров һәм режиссер-сценарист Радик Кудояровка рәхмәт әйтте.

Төшерүләр процессы турында сөйләгәндә, Зөлфәт Беларусиядә узган эшнең бик тыгыз булуын билгеләп үтте: фильмның 21 съемка көне булган, шуларның 17сен ул төшерү мәйданчыгында үткәргән. Нык тыгыз графикка карамастан, көннәр сизелмичә дә узган. «Масштаблы, тиз», – дип бәяләде ул эш барышын.

Беренче съемка көннәре тоткынлыктагы күренешләрдән башланган, анда аңа Фляйшман персонажы белән диалог алып барырга туры килгән. Актер бу эшнең мавыктыргыч булуын сөйләде. «Йокламадык, ашамадык, Муса Җәлил рухы безне алга әйдәде».

Финал күренешендә, немец пасторына текст әйткәндә, Зөлфәтнең персонажы караңгы бүлмәгә керә. Аннан соң «Стоп» командасы яңгырарга тиеш була, ләкин ул ишетелми. «Мин басып торам һәм рациядән Радик абыйның: “Бу мизгелдә Муса Җәлилнең гомере өзелде”, — дигән сүзләрен ишетәм», – дип кичерешләре белән уртаклашты Зөлфәт, шул мизгелнең тирәнлеген һәм фаҗигасен ничек тоюын искә алып.

Иҗади очрашуларның икенче кунагы – Гайнан Курмашев ролен башкарган Айрат Шамс булды. Фильмны төшергәндә аңа нибары 19 яшь була. Очрашуда тамашачылар аның кино төшерүләрдән алган тәэсирләре, режиссер һәм хезмәттәшләре белән эшләү турында фикерләре белән таныша алдылар.

«Бу фильмга алулары турында белгәч, миндә шаккату һәм гаҗәпләнү хисе булды, чөнки ул вакытта мин театр училищесының өченче курс студенты гына идем», – дип хис-тойгылары белән уртаклашты Айрат.