Әлки районында янгын: «Әсхәт абыйны коткарып кала алмадык. Күршеләре дә, эх, диделәр инде...»

Кичәге көннең бураннары Әлки районының Түбән Әлморза авылы халкы өчен дә хәерсезрәк кәефтә дулады – агач йортта ялгызы гына яшәүче 65 яшьлек Әсхәт Камалетдинов йортына ут каба. Кызганыч, үзе дә исән калмаган...

Мәгълүм ки, Әсхәт абый ялгызы яшәгән. Юхмачы авыл җирлеге башлыгы Алексей Тутерев әйтүенчә, күршеләре белән татулыктан өзелмәгән, гомумән, ызгыш-талашка кермәгән. Яшәү шартлары әллә ни сөенерлек булмаганга, туганнары аны кышкылыкка үзләренә яшәргә дә дәшкәннәр, әмма ул ризалык бирмәгән, үз өемдә – үз көем дип, нигезендә яшәүне хәерлерәк күргән. 

–    Каршы ягында йортлар юк, шуңа күрә йорты түбәсеннән төтен күтәрелә башлагач, берәү дә күрмәгән. Ә ян күршеләре күреп алганда, йортының инде түбәсе янып беткән була. Янгын сүндерүчеләргә хәбәр салып, алар бик тиз су сиптерер керешсәләр дә, соңга калынды шул – Әсхәт абыйны коткарып кала алмадык. Күршеләре дә, эх, диделәр инде. Аның янгын эчендә януын бөтенебез дә аңладык, чыгып өлгергән булса, йорты тирәли йөгереп йөрер иде ул. Кызганыч, янган гәүдәсен, күршеләре фаразлаганча, мич буенда таптылар. Әсхәт абый мич буенда утырып торган, күрәсең... Әлегә төгәл белмибез, авыл халкы әйтүенчә, Әсхәт абый мич алдына утырып, тәмәке тартырга яраткан. Көл өеме арасыннан гәүдәсен табып алганда, ул ятып тора иде. Ис тигәч тә егылгандырмы инде... Күкрәгендә, башында тишек бар. Өстенә авыр әйбер килеп төшкәндер, бәлки йортның түбәсе, матчалары өстенә төшеп шундый “эз” калдыргандыр. Янмаган түгел, янган шул, ут эчендә калгач, ялкын аны кызганып тормаган... Нәрсә дип әйтим, коточкыч хәл, күргәннәрем күз алдымнан китми, Аллаһы берәүгә дә мондый хәлләрне күрергә язмасын. Ут-күздән сак булып, имин яшәсәк иде, – ди Алексей Тутеров. 

Әсхәт Камалетдинов урман хуҗалыгында эшләп лаеклы ялга чыккач. Терлекләр асрамаган, чынлап үз җаена гына гомер сөргән. Бүген аны җирләргә әзерләнәләр.