Марат Мухин әтисенең үлеме турында: «Әлегә ышана алмыйм…»

Танылган композитор, аранжировка остасы Марат Мухин гаиләсенә зур кайгы килде — музыкантның әтисе Фәрит абый бакыйлыкка күчте.

Берничә ел элек кенә әнисен югалткан Марат бүген тулысы белән ятим калды. Якын кешесен югалту ачысын ул йөрәге аша уздырып, безнең белән уртаклашты.

— Әниегезнең вафатын бик авыр кичердегез дип беләм. Хәзер инде әти-әнисез калу белән килешә аласызмы?
— Әниемнең үлемен бик авыр кичердем, чөнки әнидән дә кадерлерәк кеше юк. Ә әтинең вафатына әлегә кадәр ышана алмыйм. Һаман аның янына килүемне, ишектән керүемне күз алдына китерәм. Ул әле дә өйдә кебек…

— Фәрит абый Халидә апага тугрылык саклап, ялгыз яшәде. Әниегезне бик юксынгандыр инде?
— Әйе, әнине бик сагынды. Гел бергә үткәргән көннәрен искә ала иде. “Әниең шулай итә иде, хәтерлисеңме?” — дип еш әйтә иде. Ул аны йөрәгендә йөртте, бик юксынды.

— Әтиегезнең вафаты көтелмәгән хәл булдымы?
— Аның гомере ахырына якынлашканын без аңладык. Бөерләре бөтенләй эшләмәде, ишемик инсульт кичерде. Өйдән ашыгыч ярдәм белән алып киттеләр. Аннан катлауланулар башланды — пневмония… ИВЛ аппаратына тоташтырдылар, 10 көн шулай ятты. Йөрәге эшләп бетерми башлады, кан басымын тоту өчен дарулар бирделәр. Соңыннан комага китте. Шунда ук күп калмаганын аңладым… өмет өзелде. Бүген әтине барлык мөселман кагыйдәләрен үтәп җирләдек.

— Бәхиллеген алып кала алдыгызмы?
— Әти ризалык белән киткәндер дип өметләнәм. Бәхиллеген алдым. Ул өч атна реанимациядә ятты, анда кертмиләр бит. Бер тапкыр гына кереп, кулларын кысып чыгарга өлгердем…

— Бик авыр сынау. Иҗатта бераз тәнәфес алырга уйламыйсызмы?
— Әти хастаханәдә чакта эшләмәдем диярлек, күңел булмады. Хәзер исә киресенчә — күбрәк эшлисем килә. Эш коткара, эшкә чумгач, бераз булса да онытылып торасың.

Якыннарын югалтканда сүзләр артык кебек. Әмма йөрәктән чыккан ихлас фикерләр генә авыр кайгыны җиңеләйтә ала. Фәрит абыйның урыны оҗмахта булсын, ә Маратка сабырлык һәм көч телибез.