28.01.2026 Хатлар

Менә нинди замана!

Без студент вакытта Ленин китапханәсенә йөрдек. Хәзерге Милли китапханәбез совет чорында шулай аталды. Китапханә КФУ янәшәсендәге борынгы Ушков йортында урнашкан иде.

Аның коридорларында буеннан- буена сузылган картотека тартмаларында фондта сакланган миллионнан артык китапның (бүгенге көндә 3,3 миллион дип исәпләнә) мәгълүматлары тупланган. Шул тартмаларны актарып үзеңә кирәкле китапны эзләп табасы һәм махсус карточкага күчереп язасы иде. Китапка заказ бирелгәч, син язган карточка махсус патронга салына һәм пневматик торбага җибәрелә. Патрон шалтыр-шолтыр тавыш чыгарып, каядыр китеп югала. Берәр сәгатьтән, яки артыграк вакыттан сиңа кирәкле китапны заказ биргән өстәлгә китереп куялар иде.

Китапханәнең яңа бинасында эш бөтенләй башкача икән. Комьютер төймәләренә басып, экранга китапның авторын һәм исемен язгач, шундук ул китап турында мәгълүмат экранга килеп чыга. “Укыйсыңмы?” дигән сорауга “әйе” дип җавап тотсаң, берничә минуттан әлеге китап синең өстәлгә автомат транспортер аша килдә дә төшә. Менә шундый әкәмәт, менә шундый замана!

Китап укучылар аз диләр. Ялгышалар. Бик күп! Китапханәнең заллары элеккеге шикелле зур түгел. Бина бик зур. Китап укучыларның өстәлләре бөтен бина буйлап, бер-берләреннән шактый ара калдырып урнаштырылган. Бик тә уңайлы һәм бик тә җайлы итеп эшләнгән.

Рәфхәт ЗАРИПОВ.

Балтач районы,

Түнтәр авылы.

---
Татарстан яшьләре
№ --- | 28.01.2026