Айсылу Габдинова: “Ял итеп тә булмады, 2 яшьлек улым артыннан йөгереп йөрдем”

Яңа ел алдыннан һәркем үз мәшәкатьләре белән мәшгуль, шуңа күпләр җырчы Айсылу Габдинованың икенче тапкыр әни булуын сизми дә калгандыр.

"20.12.2025 Кызлы булдык. Кыз әнисе булу – иң зур хыялларымның берсе иде, Аллага шөкер", –  дип язган иде Айсылу үзенең социаль челтәрләрдәге сәхифәләренең берсендә. Без дә җырчыны котлап, аның белән хәбәргә чыктык. “Кызыбызга Асыл исемен куштык”, –  диде Айсылу. 

– Котлыйбыз, Айсылу! Сау-сәламәт, бәхетле бала булып үссен. Шулай да сорыйм инде, ни өчен нәкъ кыз бала табу турында хыялландыгыз?
– Кыз бала әни өчен барыбер якын. Малай өйләнгәч хатыныныкы була, ә кыз әнисе янында була инде ул. Минем дә әни белән араларым бик якын, без дус кызлар кебек. Миңа да шундый "подружка" кирәк. 

– Йөклелек чорыгыз авыр узмадымы?
– Җиңел булды дип мактана алмыйм, әмма җиңеп чыга алмаслык кыенлыклар да күрмәдем, шөкер. Хастаханәдә күзәтү астында булмадым, шулай да шикәр, камыр ризыклары ашамадым.  Ял итеп тә булмады, 2 яшьлек улым артыннан йөгереп йөрдем. 

– Хәзер партнерские роды бик популяр. Сезнең дә алай булмадымы? Гомумән, моңа карашыгыз нинди?
– Ирем янымда булды. Мин моңа уңай карыйм. Якын кешең яныңда булу көч бирә, хастаханә хезмәткәрләренең мөнәсәбәте дә башкача. 

– Нәкъ яңа ел алдыннан бала табу да үзгә хисләр калдырадыр? Яңа ел көнне бала табу ихтималы булгандыр? 
– Иң башта табиблар бала 1 гыйнвар туачак дигән фараз әйтте. Бу хәбәрне бик үк шатланып кабул итмәдем. Әмма кызым Яңа елны өйдә каршы алырга мөмкинлек бирде, шөкер.

– Яңа елга нинди теләкләр белән кердегез?
– Яңа елга иң зур теләгем исән-сау, армыйча, яхшы кәефтә балаларымны үстерергә һәм укуны тәмамларга. Винера Ахатовна курсында магистратурада укыйм. Улым белән бергә дәресләргә йөрдек. Укуны тәмамлап булса, бик әйбәт булыр иде. Һәммәбезгә бәхет телим.