Әйдә, шаярт, Самара!

Студентлар һәм мәктәп укучыларыннан торган өч команда шаярту һәм мәзәкләр юнәлешендә остаз булган Радик әфәнде һәм Алсу Зарипова белән “Шаяннар һәм тапкырлар”ның серләренә төшенделәр, үзләре мәзәкләр язарга, сәхнәләштерелгән күренешләр куярга өйрәнделәр. Өченче көнне, 20 декабрьдә, укуга йомгак ясалды, һәм командалар үз осталыкларын тамашачыларга тәкъдим иттеләр. Ә жюри әгъзалары уенчыларның әзерлек дәрәҗәсенә бәя бирделәр.

 

Әзерләнү өчен вакыт бик аз булуына карамастан, ко¬ман¬даларның бик тырышканнары, күп көч куйганнары сизелде. Чөнки Гран-при откан команда 2026 елның язында Казанда узачак “Шаярт” телевизион фестивальдә катнашачак. Һәм, уен нәтиҗәләре буенча, Самараны бу чарада “Алтын” кызлар командасы тәкъдим итәчәк! 

 

Афәрин! Беренче урынга Самара шәһәр округының “Восход” балалар иҗаты үзә¬ге каршындагы “Алга” командасы чыкты. Рәшит Саттаров җитәкчелегендәге әлеге төркемдә мәктәп укучылары шөгыльләнә. Ә шәһәребезнең төрле көллиятләрендә укучы студентлардан оешкан “Яз, көз, кыш – яшьлек” командасы икенче урынга лаек булды. Моннан тыш, Илназ Мәҗитов (“Яз, көз, кыш – яшьлек” командасы уенчысы) - “Иң яхшы актер”, ә Вика Казатдаева (“Алга” командасы уенчысы) “Иң яхшы актриса” номинациясендә җиңү яуладылар. “Алтын” төркеменең мәзәкләре исә “Иң кызык мәзәк” дип танылдылар.

 

 

Мондый форматтагы КВН оештыруны Радик Рәшитович тәкъдим иткән.

 

“Казанда яшьләр арасында татар теле бетте диярлек, - ди хөрмәтле кунак, авыр сулап. - Безнең лига менә инде 30 елга якын Татарстанның яшьләр иҗат берләшмәләрен үстерү һәм аларга ярдәм итү, егетләрдә-кызларда милли үзаңны, үз халкының мә¬дәни һәм тарихи мирасына хөрмәтне торгызу, яшьләрнең интеллектуаль һәм иҗади активлыгын арттыру юнәлешендә эшли. 

 

«Әйдә, ШаяРТ!» Татарстанның Яшьләр эшләре министр¬лыгы, Татар телен һәм Республикада яшәүче ха-лыклар вәкилләренең туган телләрен саклау, үстерү мәсьәләләре буенча Татарстан Җөмһүрияте рәисе каршындагы комиссия һәм “Шаяннар һәм тапкырлар клубы” тарафыннан оештырылган, “ТНВ” телерадиокомпаниясендә чыгып килә. Моңа кадәр без нигәдер регионнарга игътибар бирми идек. Ә менә быел Татарстаннан читтә яшәүче милләттәшләребез бе¬лән элемтәләрне ныгытырга, яшьләребезне юмор, уен-көлке аша берләштерергә булдык һәм Самарадан башладык. Киләчәктә Оренбург, Пенза якларына юл тотарга ниятлибез. Бәлки, телебезне саклап калырга өмет бардыр әле. Без, үз чиратыбызда, кулдан килгән өлешебезне кер¬тергә тырышачакбыз. Әлеге башлангыч уңышлы һәм дәвамлы булыр, дип өметләнеп калабыз”. 

 

Үз чиратымда, Радик әфәнде белән Алсу Зариповага безнең өлкә яшьләре бе¬лән эшләргә вакыт тапканнары, шәһәребезнең татар яшь¬ләре оешмасы җитәкчесе Фәрзанә Мәхмүтовага әлеге очрашуны, татарча КВНны оештырганы өчен зур рәхмәт җиткерәсем килә. Хөрмәтле әти-әниләр, әби-бабайлар! Балаларыбызга туган телебезне өйрәтик, татар исемен йөртеп кенә, үзеңне татар дип санау дөрес түгел бит!