Биш бала ятим калган

Казахстанда 5 бала үстергән ир белән хатын югалган. Икенче көнне волонтерлар төркеме шәһәрдән 18 километр ераклыкта, трассадан бераз читтәрәк, далада 29 яшьлек Гөлҗаһан белән аның 40 яшьлек ире Аманжол мәетен тапкан.
 

Ир белән хатынның балигъ булмаган 5 баласы ятим калган. Балаларның иң кечесенә 3 яшь.

Ир белән хатын 20 ноябрьдә 17:30 сәгать тирәсендә өйдән чыгып киткән. Алар куе зәңгәр төстәге Toyota Camry автомобилендә булган. Гөлҗаһан, өйдән чыгып киткәндә, сеңлесенә ире белән үзара нәрсәдер хәл итәргә җыенуларын әйткән. Кичке ашка кайтып җитәбез, дип вәгъдә иткән. Әмма берничә сәгатьтән ир белән хатынның икесенең дә телефоннары сүндерелгән яки элемтә зонасыннан читтә булган. Туганнары төнлә полициягә мөрәҗәгать иткән.

21 ноябрь иртәсендә ир белән хатынны волонтерлар эзләргә тотынган. Төштән соң эзләүчеләр төркеме төп юлдан читтәрәк, далада аларның автомобилен тапкан. Машина йөртүченең ишеге ачык, ачкыч кабызу йозагында булган.

Салонда арткы утыргычта Гөлҗаһан мәете була, аның тәнендә берничә пычак кадаганнар. Янәшәдә машина идәнендә аш бүлмәсендә куллана торган пычак табылган. Автомобильдән 60 метр ераклыкта Аманжол мәете яткан.

Тикшерүчеләр «Кеше үтерү» маддәсе нигезендә җинаять эше ачкан. Хәзерге вакытта тикшерүнең төп версиясе – ир-ат кинәт килеп чыккан көнкүреш конфликты аркасында хатынын үтергән һәм үз-үзенә кул салган. Шул ук вакытта башка кешеләр катнашында мөмкин булган версияләр дә карала.

Билгеле булганча, соңгы ярты елда гаиләдә җитди финанс проблемалары булган. Аманжол җәй көне эшеннән киткән һәм шуннан бирле эш таба алмаган. Гөлҗаһан базарда сатып акча эшләгән, ләкин керем җитәрлек булмаган. Туганнары сөйләвенчә, соңгы атналарда ир белән хатын акча мәсьәләсенә еш ачуланышкан, ләкин кул күтәрүгә барып җиткәннәре булмаган.

Ятим калган 5 бала хәзерге вакытта Гөлҗаһанның сеңлесендә. Гаиләнең туганнары балаларны алга таба аякка бастыру өчен акча җыеша башлаган.

Чыганак: Космомольская правда