Шешә тапшыру бетәчәк

2012 елның 1 июленнән башлап Русиядә пыяладан эшләнгән балалар азыгы һәм сыра шешәләрен икенче кат куллану тыелачак.

Бөтен дөньяда пыяла шешәләрнең уңайлы, табигатьне пычратмый торган, арзанлы савыт икәнен беләләр һәм юып, кабат-кабат кулланалар. Моңа кадәр бу бездә дә шулай иде. Әмма хәзер ни өчендер “пыяла шешәләр җитәрлек дәрәҗәдә чиста итеп юылмый, шуңа күрә аны кабат кулланырга ярамый” дигән фикер әйтелгән. Югыйсә, яңа шешә ясауга караганда, аны яхшылап юу күпкә арзангарак төшәр иде.

Бу тыюның файдасын шешә җитештерүчеләр күрәчәк, ә менә зыяны бөтен кешегә дә тиячәк. Урамнарда күпме пыяла ватыгы барлыкка киләчәген күз алдына китереп карагыз әле. Чүплекләрдәге чүпнең күләме дә (пыяла – беркайчан да череми, юкка чыкмый торган чүп) икеләтә, өчләтә артачак. Җитмәсә туктаусыз яңа шешә ясау өчен көн саен әллә күпме миллион тонна ком, күпме энергия сарыф ителәчәк. Бомжлар да төп акча чыганагын югалтачак.

P.S. Совет вакытында безнең урамнарыбыз күпкә чистарак иде. Сәбәбе – бөтен сыеклыклар да пыяла шешәдә сатыла һәм буш шешәләрне кыйбат бәягә кабул итәләр иде. Күп очракта шешә тапшырмаган кешегә сөт яки кефир сатмыйлар да иде.