Зәринә Хәсәншина: «Мин - укытучы. Бу эшнең авырлыгын укыта башлагач кына аңлыйсың икән...»

Җырчы Зәринә Хәсәншина тамашачыларны яңа дуэт белән сөендерде. Җырчы үзенең әнисе Фәнисә ханым белән дуэт яздырган. Зәринәнең социаль челтәрләрен күзәтеп баручы игътибарлы тамашачылар Фәнисә ханымның укытучы булып эшләвен дә белә.

Дуэт җыр да, шуңа күрә "Укытучы кызы" дип атала. 

– Зәринә, әни белән дуэт яздыру идеясе кайчан туды? 
– Дөресен әйткәндә, әни белән дуэт яздыру башыма да килмәс иде, әгәр укытучылар көне уңаеннан үткәреләсе зур чарага оештыручылар: "Зәринә,бәлки әниең белән дуэт җырларсыз", – дигән тәкъдим белән чыкмасалар. Әлбәттә, мин әнинең ризалашмавын 100% белә идем, әйтүгә үк: "Юк!", – дип кырт кисте, ләкин мин холкым буенча үземнекен эшли торган кеше. Психологик чаралара кулланып әнине дуэт җырларга күндердем.

– Фәнисә апа элек тә җырлый идеме? 
– Элек әнием, чыннан да, җырлаган, ләкин мин кечкенә чакта аның тамагына операция ясадылар. Шуннан соң җырламый башлавын  хәтерлим.

– Әниегез белән мөнәсәбтләрне ничек бәялисез? Фәнисә апа сезне сүгеп тә ала бугай...
– Безнең мөнәсәбәтләр - иң җылы һәм ачыктак-ачык мөнәсәбәт ул, без бер-беребезгә бар зарларымны сөйлибез. Ә сүгүләргә килгәндә, әти-әни дә безне әзрәк сүгеп тормаса, без үзебез дә азу яра башлыйбыз. Әти-әнигә шундый тәрбия биргәннәре өчен рәхмәтле, алар сөеп тә, сүгеп тә торалар. Әлбәттә,социаль челтәрдә әнинең ачулы вакытын күбрәк күрсәткәнгә, кеше әнине бик усал,кырыс дип уйлый, гәрчә алай булмаса да. Беләсезме, минем әнидән дә күбрәк миңа ышанган кеше юк, аның беркайчан да миңа: "Син булдыра алмыйсың, алай итеп йөрмә", - дигәне дә юк,ул гел минем өчен, һәрвакыт минем яклы.

– Үзегез дә укытучы булырга теләмисезме? 
– Мин инде укытучы, вокал укытам. Бу эшнең авырлыгын укыта башлагач кына аңлыйсың икән. 

Фото Зәринә Хәсәншинаның шәхси архивыннан