Ринат Рахматуллинның яшь хатыны Динара бәби көтә?

Җырчы Ринат Рахматуллинның яшь тормыш иптәше Динара эстрада тормышына битараф булмаганнарның игътибарыннан югалмый.

Динарага тамашачылар юллаган сораулар арасында: “Балагыз кайчан туа?” – дигән сүзләрне күрдек. Баксаң, тамашачылар инде күптән Динараны йөкле дип уйлый икән. Имеш-мимешләргә ачыклык кертү өчен бу сорауларны Динараның үзенә бирдек.

– Бу арада бала, йөклелек турында сораулар күп булды. Юк, мин йөкле түгел — бар да Аллаһ кулында!

– Ринат абый белән мөнәсәбәтләрегез дә вакыт белән сыналып бара кебек. Хәзер халык сиңа карата нинди фикердә?

– Дөресен генә әйткәндә, төрле кеше бар: кемдер яратып карый, кемдер  явызлык белән, кайсыдыр йөземә елмаеп карый да, минем арттан начар сүз әйтеп йөри. Мин андыйларга игътибар итмим. Социаль челтәрләрдә һәрвакыт шушы бүленеш булачак — кемдер сине бик ярата, ә кемдер, киресенчә, күрә алмый. Соңгы айларда социаль челтәрләрем актив үсә башлады, кешеләр минем белән кызыксына. Шуңа күрә анда үз фикерләрем, төрле темаларга карашларым белән уртаклаша башладым. Әлбәттә, безнең мөнәсәбәтләргә карата һәркемнең үз фикере бар. Бу табигый хәл.  Моңа өстәп, безнең командабыз да киңәйде.  СММ-специалист, рилсмейкер һәм маркетолог бар — алар безнең фикерләрне төрле яктан ачып күрсәтәләр, шуңа күрә кайвакыт комментарийларда бәхәсләр дә туа.

– Концерт директорларыгыз алышынды бераз, хәзер кем белән эшлисез һәм ни өчен?

– Концерт директоры турында — әйе, хәзер ул бездә юк. Бу вазыйфаны мин үзем башкарам. Моннан тыш администратор да әле. Мин өстә касса, документлар, хезмәт хаклары – бу концертларның  күзгә күренми торган өлеше, әмма аннан башка команда да алга таба бара алмаячак.

Концерт вакытында тавыш, яктылык, экраннар, видео — һәр деталь атмосфера тудыру һәм тамашачыга энергетика тапшыру өчен мөһим. Әгәр берәр нәрсә эшләмәсә, барысы да туктала, шуңа күрә мин барысының да сәгать кебек төгәл эшләвен күзәтәм.

Минем бурыч – команда турында кайгырту. Барысы да вакытында торып ашасын, репетициягә өлгерсен өчен тырышам. Шәхси миссиям дә бар, мин-Ринатның ярдәмчесе. Сәхнә костюмнарын үзем әзерлим, аларны тиешле тәртиптә тезеп куям. Кайчагында әле мин машина йөртүче дә. Төне буе руль артында да утыра алам. Һәм әлбәттә, мин-хатын. Бу янәшә булу, сәхнәгә чыкканчы ярдәм итү һәм соңыннан ял итеп, яңа көчләр белән эшләргә ярдәм итү дигән сүз. Бу, мөгаен, иң мөһим рольдер. Барлык туй-мәҗлесләрдә чыгыш ясауларны контрольдә тотам, барлык графиклар минем өстә. Кыскасы, чара, концерт узсын һәм тамашачылар күңелендә озакка уелып калырдай хис-кичерешләр бүләк итсен өчен кулдан килгәннең барысын да эшләүче кеше мин. Ринат колониядән чыккач, мин аны рухландырырга тырыштым. Ул яңа көч белән эшли башлады, күтәрелеп китте. Ул вакытта миндә зур мотивация һәм энергия бар иде, ләкин белем җитми иде. Бер ел эчендә үземне ныгытып, кирәкле күнекмәләр алдым һәм хәзер бу эшне үз кулымда тота алам. Теләк булса, өйрәнеп була. Әлбәттә, документлар, оештыру мәсьәләләре буенча ярдәмчеләребез дә бар. Аларсыз гына да булмый.