|
|
Бүген кемнәр туган
|
|
Архив
|
20.09.2011 Мәдәният
Авыр югалтуТатарстан Республикасының театр сәнгате зур югалту кичерә. 20 сентябрьдә 94 нче яшендә күренекле актриса, Татарстанның һәм Россиянең халык артисткасы Вера Егоровна Минкина вафат булды.
Минкина В.Е. 1918 елның 9 сентябрендә Чистай районы Бахта авылында туа. Мәктәп елларыннан ук артист булырга хыялланган кыз Казанга килеп Театр техникумына укырга керә һәм аны 1939 елда тәмамлый. Иҗат юлын Күчмә театрда башлый. 1952 елдан ул Г.Камал исемендәге Татар дәүләт Академия театры артисткасы. Вера Минкина бөтен тормышын театрга багышлаган искиткеч талантлы шәхес, татар театрына 60 елдан артык хезмәт иткән сирәк артистларның берсе иде. Кабатланмас һәм үзенчәлекле табигый таланты, киң сәхнә диапазоны, хатын-кыз табигатен нечкә сиземләве һәм шулай ук үзенең шәхси сыйфатлары артисткага гаҗәеп тормышчан, ихлас образлар иҗат итәргә мөмкинлек бирде. Аның барлык персонажлары - малайлардан алып төрле яшьтәге, холыктагы хатын-кызлары да тормышка гашыйк, зур ихтыяр көченә ия, кояшлы һәм бай эчке дөньялы иде. Төрле елларда башкарылган Уңганбикә (“Кыз урлау” М.Кәрим), Полина (“Дошманнар” М.Горький), Малай (“Зәңгәр шәл” К.Тинчурин), Кәләмзә (“Зифа” Н.Исәнбәт), Гыйльмениса (“Чаткылар”Т.Гыйззәт), Факиһә (“Беренче театр” Г.Камал), Мелита (“Кол” Г.Фигейредо), Мария Ильинична (“Баһадирлар” Н.Погодин), Бибиәсма (“Күк капусы ачылса” X.Вахит), Хөлә (“Әбиләргә ни җитми” Ф.Бүләков), Ана (“Моңлы бер җыр” Т.Миңнуллин), Степанида (“Җимерелгән бәхет” А.Островский), Екатерина (“Яшь йөрәкләр” Ф.Бурнаш), Хәмдебану (“Әлдермештән Әлмәндәр” Т.Миңнуллин) һ.б. рольләре аныћ иќат биографиясендә генә түгел, татар театр сәнгате тарихы битләрендә дә күренекле урын алган гүзәл образлар булды. Һәрвакыт яшь күңелле артистка үзенең 90 яшьлек юбилеенда сәхнәдә “Гөргөри кияүләре” (Т.Миңнуллин) спектаклендә Палый ролендә уйнап, талантына баш июче тамашачыларын тагын бер кат сокландырган иде. В.Е.Минкинаның иҗаты театр сәнгате белән генә чикләнмәде, ул радио, телевидение тапшыруларында да даими чыгыш ясады, “Зифа оныгы – Ришат”, “Хәзинә” нәфис фильмнарында төшеп, ил күләмендә тамашачы мәхәббәтен казанды. Халкыбызның сөекле артисткасы, Татарстанның һәм Россиянең халык артисткасы Вера Минкинаның якты истәлеге безнең күңелләрдә мәңге сакланыр. Артистка белән хушлашу Г.Камал театры бинасында 21 сентябрьдә 10.30 сәгатьтә була.
--- |
Иң күп укылган
|