28.08.2025 Матбугат

«Акчарлак» Казанны шаулатты (ФОТО)

21 августта, Казанның “Уникс” концертлар залында, күптән көтелгән очрашу – “Акчарлак шоу” концерты гөрләп узды. Ул көнне “Уникс” умарта күче кебек гөжләде. Махсус ясалган “Акчарлак” банеры янында чират торып, истәлеккә фотога төштеләр. Тамашачылар илебезнең төрле төбәкләреннән җыелган иде.

Менә бәйрәм башланып китте. Озын толымлы, күз явын алырлык Сәйдә Мөхәммәтҗанова “Акчарлак” гимнын башкарды. Ә бит кайчан гына ул Габделфәт Сафин белән сәхнәгә тәүге адымнарын ясаган иде...

Концертны Айваз Садыров, Гөлназ Сәфәроваһәм Айнур Сөләйманов – өчәүләшеп алып бардылар.

Менә сәхнәгә дәртле җырлары, шундый ук биючеләре белән Илнат Фәрхуллин чыкты. Аннан соң – Зәринә Хәсәншина, Рөстәм Закиров, Рәфинә Ганиуллина, Марат Яруллин, Сиринә Зәйнетдинова, Вадим Захаров...

Бераздан вәгъдә ителгән бүләкләр – 25 кешегә ярты елга “Акчарлак”ка бушка язылу тапшырылды. Без алдан 25 урынга кәгазьләр беркетеп чыккан идек. Алып баручылар игълан итү белән, халык торып басып урынын капшый башлады. Кәгазьне табучылар арасында сөенеп кулларын күтәрүчеләр, “ура!” диючеләр дә, тыныч кына елмаеп куючылар да булды. Яхшы бүләк бит!

Аннан экраннардан халыкка турыдан-туры күрсәтелгән очраклы саннар генераторы ярдәмендә “Ливадия-Татарстан” санаториясенә ике кешелек юллама(путевка) уйнатылды. Унынчы рәттә утыручы Альбина ханымга чыкты әлеге төп бүләк.

Тиздән концертны алып баручылар сәхнәгә легендар җырчы – Габделфәт Сафинның үзен чакырды. Җырчы күренү белән халык аны алкышларга күмде.

Икенче бүлекне “Айфара” башлап җибәрде. Легендар “Ак каен” җырына күпләр кушылып җырлап, яшьлекләрен искә төшереп утырды. Аннан соң экраннардан редакция кызлары, егетләре белән төшерелгән мини-фильм күрсәтелде. Журналистның бер көнен тасвирлаган әлеге маҗаралы фильм күпләр күңеленә хуш килде. Редакциядәге һәр журналист белән кыскача видеотаныштыру күрсәтелгәннән соң, сәхнәгә “Татмедиа” җитәкчесе Айдар Сәлимгәрәев күтәрелде. Ул агентлыкның мактау грамоталары белән газетабызның проектлар җитәкчесе Әдилә Рәхимованы һәм бухгалтерыбыз Лилия Шәймәрданованы бүләкләде.

Рузилә ханым сәхнәдә шигырь сөйләгәндә күпләр яшьләрен сөртеп алды. Аннан соң үзенең “банда”сы беләнИлсөя Бәдретдинова күренде, үзенең дәртле җырларын тамашачыга бүләк итте.

Бәйрәмне төгәлләп, десертка “Чияләр”е белән кабат Габделфәт Сафин чыкты. Видео төшерергә дип телефоннар кабызылды, түзмәүчеләр биергә үк сикереп торды.

Бакыйлыкка күчкән хезмәттәшләребез, җырчылар, язучылар да искә алынды бу бәйрәмдә. Халык белән рәхәтләнеп аралаштык, бергә җырладык, елмайдык, елап та алдык. Кыскасы, күңел кушканча шәп очрашу булды! Әле аның хатирәләре күңелләрдә озак сакланыр...

Румия СӘЙФУЛЛИНА, Нәзилә ХУҖИНА.

Бәйрәмнән кайбер мизгелләр: