03.09.2011 Мәдәният
Фестиваль кысаларында фестиваль
2011 елның 6 һәм 11 сентябрендә “Казан” Милли-мәдәни үзәгендә VII Казан халыкара мөселман киносы фестивале кысаларында Россия анимациясенең 100 еллыгына багышланган “Kazanima” беренче Анимацион Кино фестивале узачак.
Конкурс программасындагы фильмнарны 6 сентябрьдә “Гранд Синема” кинотеатрында, 11 сентябрьдә “Казан” Милли-мәдәни үзәгенең кинозалында күрсәтәчәкләр.
Фестивальнең конкурс программасына танылган анимацион студияләр һәм бәйсез режиссерларның 46 анимацион эше кертелгән.
Тугыз номинация буенча билгеләнгән фестиваль җиңүчеләренә фестиваль символы – Әкият кызы сурәте төшерелгән сын һәм фестивальнең партнеры “Мегафон” компаниясеннән истәлекле бүләкләр тапшырылачак.
Фестивальнең жюри составына танылган Россия аниматорлары һәм җирле мәдәният әһелләре кертелгән:
- Елена Таврог – кино белгече, РФ кинематографлары берлегенең аниматорлар ассоциациясе секретаре (Мәскәү шәһәре);
- Сергей Киатров – «Татармультфильм» берләшмәсенең баш режиссеры (Казан шәһәре);
- Марат Ганиев – продюсер, Татарстан анимацион киносы ассоциациясенең җитәкчесе;
- Дмитрий Пивоваров – журналист, кино тәнкыйтьчесе (Казан шәһәре);
- Михаил Алдашин – Россия режиссёр-аниматоры, рәссам, продюсер. «Пилот» студиясендә эшләгән, «ШАР» мәктәп-студиясендә укыта. (Мәскәү шәһәре);
- Наталья Березовая – «Пилот» студиясе режиссеры, «Анеси» бүләге иясе, «Про Барана и Козла», «Моя жизнь» (“Кәҗә белән Сарык турында”, “Минем гомерем”) исемле танылган анимацион фильмнарның авторы (Мәскәү шәһәре);
- Анна Мальгинова – режиссер-мультипликатор, сценарист, «Смешариклар»ны уйлап табучыларның берсе (Уфа шәһәре);
Төп бүләк – фестивальнең Гран-приен “Пирамида” мәдәни күңел ачу комплексы сәхнәсендә, Казан халыкара мөселман киносы фестивален ябу кысаларында, РФ кинематографлары берлегенең аниматорлар ассоциациясе президенты Александр Герасимов тапшырачак.
Фестиваль кысаларында режиссёр-аниматор Михаил Алдашин, мультипликатор Сергей Меринов, анимацион кино продюсеры һәм Россия анимацион кино ассоциациясе директоры Александр Герасимов мастер-класслар үткәрәчәк.
Фестиваль турында барлык өстәмә мәгълүмат – мастер-класслар расписаниесе, кинотеатрларда конкурс программасын күрсәтү, катнашучылар исемлеге, бүләкләр www.kazanima.ru дип аталган фестиваль сайтында.