“Өйләнсәң – өйләнәсең, өйләнмәсәң, мин бүтәнгә чыгам” (ФОТО)

Бу көннәрдә бөтен артистлар, алып баручылар Сабантуйларда чыгыш ясады, халыкны җырлатты, биетте, уйнатты һәм үзләре дә рәхәтләнеп күңел ачты. Бер көн эчендә өчәр урынга җитешүчеләр дә булган. Җырчы Гөлүс Хәбибрахманов та Сабантуйлардан читтә калмады, әлбәттә. Һәм шул ук вакытта, Гөлүс белән хатыны Галия авылдагы хуҗалыкны да онытып бетермәделәр.

Аларның парнигында инде помидор һәм кыярлар да үсеп килә. Галия бөтен нәрсәне тәртипләп, кайда кайчан нәрсә ничек утыртылган, барын да махсус дәфтәргә теркәп бара икән.

Ә шушындый уңган-булган хатынга ничек тәкъдим ясаган икән соң Гөлүс? Бу хакта ул “Сөембикә” журналына биргән интервьюда менә ни дигән:

– Мин аңа тәкъдим ясамадым. Әле андый уем да юк иде – эстрада дип шашып йөргән чагым... Шул көннәрдә Галия: “Өйләнсәң – өйләнәсең, өйләнмәсәң, мин бүтәнгә чыгам”, – диде. Аны югалтасым килми иде... Нәкъ шул вакытта мине армиягә дә алырга мөмкиннәр иде. Китеп барсам, Галиясез калам, дим. Шундук: “Өйләнәм!” – дип җавап бирдем. Туйны җәй көне үткәрергә уйлаган идек.

Әмма ул елны май аенда әтимне югалттык. Нибары 49 яшендә... Туйны кичектерергә туры килде – сентябрьдә генә ясадык. Галияне сорарга җәй көне генә бардык, әтисез...