05.06.2025 Шоу-бизнес

Рәсим Низамов: "Утыз елдан артык Сабан туе караганым юк"

Татарстанның халык артисты Рәсим Низамов та Сабан туена әзерләнә. Ул быел Мамадыш, Кукмара, Әгерҗе, Теләче, Саба районнарында була. Җырчы белән Сабан туйлар турында җәһәт әңгәмә кордык.

- Шушы ике көн эчендә район, авылларда Сабан туйлары узачак. Авыллар да әзерләнә, җырчылар да әзерләнә инде. Барысын да яхшы гына эшләп чыгарга язсын. Чыгыш ясыйсы Сабан туйларының аралары ерак түгел, җитешергә инде.

- Сабан туенда ял итәсе килмиме?

- Мин аның турында оныттым да инде. 30 елдан артык Сабан туе караганым юк. Җырчыларның эше шундый. Кеше ял иткәндә без эшләргә тиеш. Бу тәртәгә җигелгәнсең икән, шуңа риза буласың. “Эх, ял итәргә иде Сабан туенда”, - дип уйлап куясың инде. Ләкин эшләргә кирәк.

- Сабан туйларга чакырып торалармы? Популярлык сизеләме?

- “Мине чакырыгыз әле” - дип чәчрәп чыкканым булмады, шөкер. Сабан туена чакырулар әле дә килә. Һәр авылның бәйрәмне югары дәрәҗәдә үткәрәсе килә, монысына сөенәм, әлбәттә. Авыл халкының эше беркайчан бетми. Авыл халкы үзенә бер матур бәйрәм оештыра икән, шатланырга кирәк. Авыл яши икән, татар халкы яши. Тел нәрсә дисәгез дә авылда саклана.

- Авыллар җырчылар чакырып бер-берсе белән узышмыймы?

- Мөмкинлекләре бар икән, нишләп чакырмаска? Юрганыңа карап аягыңны сузасың инде. Кешегә күрсәтер өчен генә эшләнгән әйбернең дәрәҗәсе булмый. Халык өчен эшләргә кирәк. Районга да бушка кайткан чакларым бар. Бөтен әйберне дә акчага гына кайтарып калсаң, иртәгәсе көнгә балта чабасың. Башка артистлар нинди бәя куядыр анысына игътибар итмим. Башка кешенең акчасында минем эшем юк. Иң мөһиме - халыкка матур бәйрәм оештырыйк.

Фото: "Татар-информ"

Илгизә ГАЛИУЛЛИНА
Шәһри Казан
№ --- | 05.06.2025