04.06.2025 Икътисад

Татарстан районнарында милли проект буенча агротехнологик класслар булдырылачак

Татарстан Республикасы Авыл хуҗалыгы һәм азык-төлек министрлыгында «Азык-төлек иминлеген технологик тәэмин итү» илкүләм проектының «АПКда кадрлар» федераль проектын гамәлгә ашыру кысаларында Татарстан Республикасында агротехнологик класслар булдыру мәсьәләләре буенча киңәшмә узды.

Чарада министр урынбасары Марсель Мәхмүтов, Татарстан Республикасы Аграр яшьләр берләшмәсе рәисе Миләүшә Заһидуллина, Министрлыкның фән, мәгариф һәм инновацион технологияләр бүлеге башлыгы Алмаз Гамиров, шулай ук муниципаль районнарның авыл хуҗалыгы һәм азык-төлек идарәләре башлыклары, башкарма комитетлар вәкилләре, мәктәп директорлары һәм инвесторлар катнашты.

Илкүләм проект кысаларында республиканың муниципаль районнарында агротехнологик класслар оештыру планлаштырыла. Аларны оештыруның максаты - гомуми белем бирү оешмасының, профильле югары уку йортларының, профильле көллиятләрнең һәм эш бирүчеләрнең үзара хезмәттәшлеге нигезендә агросәнәгать комплексы өчен кадрларны өзлексез әзерләү системасын булдыру.

Агротехнологик класслар, агросәнәгать комплексы өлкәсендә эш бирүчеләрнең кадрларга ихтыяҗын фаразлауны исәпкә алып, профильле агротехнология фәннәрен тирәнтен өйрәнү максатларында төп гомуми (7 – 9 сыйныфлар) һәм урта гомуми белем (10 - 11 сыйныфлар) дәрәҗәләрендә төзелә.

Агротехнологик класслар түбәндәге белгечлекләр буенча бүленә:«Генетика һәм үсемлекләр селекциясе», «Нәтиҗәле терлекчелек һәм заманча азык», «Киләчәктә кошчылык: технологияләр һәм идарә», «Умартачылыкның заманча технологияләре», «Аквакультура», «Биотехнологияләр һәм азык җитештерү», «Чәчәк үстерү» һәм «Агроинженерия».

---
ТР Авыл хуҗалыгы һәм азык-төлек министрлыгы
№ --- | 04.06.2025