Кариев театры коллективы Фәрит Хәбибуллинның каберенә зиярәт кылды (ФОТО)

31 нче майда Кариев театрына нигез салучы, аның беренче директоры, режиссёр, Татарстан Республикасының атказанган сәнгать эшлеклесе Фәрит Хәбибуллинның туган көне иде. Традиция буенча, Кариев театры коллективы аның каберенә зиярәт кылды, чәчәкләр салды, руханы дога укыды.

Фәрит Әхмәтҗан улы Хәбибуллин 1941 елның 31 маенда Камчаткада, Усть-Камчатский районының Козыревское авылында туа.

Мәскәү мәдәният институтын тәмамлый (1978), бер үк вакытта, 1967-1978 елларда, Ульянов, Тубыл шәһәрләре театрларында актёр булып эшли.

1978-1985 елларда Татар драма һәм комедия театры режиссёры булып эшли, аның сәхнәсендә 9 спектакль куя.

1985 елда ТАССР Мәгариф министрлыгы каршында студия оештыра, 1991 елда ул ТР МК карары нигезендә Казан татар яшь тамашачылар театрына үзгәртелә. Әлеге театрның бер үк вакытта директоры да, сәнгать җитәкчесе дә буларак, Хәбибуллин труппаның профессиональ үсешенә күп көч куя, иҗади белем бирүне оештыра, репертуар булдыра.

2001 елдан Казан театр училищесендә укыта.

Фәрит Хәбибуллин 2007 елның 27 декабрендә Казанда вафат була.