30.05.2025 Икътисад

Татарстан Авыл хуҗалыгы һәм азык-төлек министрлыгында Төркия делегациясе булды

Бүген Татарстан Республикасы Авыл хуҗалыгы һәм азык-төлек министрлыгында Татарстан Республикасы авыл хуҗалыгы һәм азык-төлек министрының беренче урынбасары Ленар Гарипов рәислегендә Төркия делегациясе белән эшлекле очрашу узды.

Очрашуда шулай ук министр урынбасары Дмитрий Яшин, «РАЦИН» АҖенең коммерция директоры Айдар Зарипов, азык-төлек базарын үстерү бүлеге башлыгы Валентин Спичков һәм «Ак Барс» ХК АҖенең коммерция директоры урынбасары Иван Коробов катнашты.

Төркия делегациясе составына кукуруз, көнбагыш һәм шикәр чөгендере орлыклары җитештерү буенча «Beta Ziraat ve Ticaret A.Ş.» Озер Әхмәт һәм Темел Абдулла Сенсер, орлык заводлары өчен җайланмалар җитештерү оешмасы «Akyurek technology machine» вәкилләре Умут Акюрек һәм Гелькой Онур Мерт, шулай ук «Хамай» ҖЧҖ генераль директоры Венера Шакирянова һәм «Хамай» компаниясенең Төркия вәкилләре Марат Хәйретдинов һәм Айваджик Абдулла кергән иде.

Ленар Гарипов Татарстан Республикасы агросәнәгать комплексының мөмкинлекләре турында сөйләде: “Авыл хуҗалыгы продукциясен җитештерү күләмнәре буенча Татарстан Республикасы Идел буе федераль округында беренче урында һәм ил төбәкләре арасында лидерлар өчлегендә тора. Илнең 2% авыл хуҗалыгы җирләрен биләп, республика аның авыл хуҗалыгы продукциясенең 3,8%ын җитештерә”.

Ул, 2024 елда республикада бөртеклеләрдән 3,9 млн тоннадан артык уңыш җыелды, шикәр чөгендере - 2,4 млн тонна, майлы культуралар - 839 мең тонна, бәрәңге - 967 мең тонна, яшелчәләр - 295 мең тонна булды, диде. Узган ел барлык категория хуҗалыкларда сөт җитештерү 2 млн 281 мең тоннага җитте.

Очрашу барышында катнашучылар Татарстан Республикасы территориясендә "Ак Барс" холдинг компаниясе" АҖ белән берлектә шикәр чөгендере, кукуруз һәм көнбагыш орлыкларын эшкәртү буенча орлык заводы төзү мөмкинлеге турында фикер алыштылар.

Татарстан Республикасы белән Төркия Республикасы арасында тышкы икътисадый багланышлар актив үсә. Төркиядән республикага фисташка, ак май һәм миндаль кайтарыла, Татарстан чүпрә, көнбагыш һәм сафлор җибәрә. Үзара файдалы мөнәсәбәтләр партнерлыкны ныгыта һәм «Халыкара кооперация һәм экспорт» илкүләм проекты максатларына туры килә.

---
ТР Авыл хуҗалыгы һәм азык-төлек министрлыгы
№ --- | 30.05.2025