НӘҖИП БӘДРЕТДИНОВ МАШИНАДА НИ ТЫҢЛЫЙ?

“Җырлыйк әле” тапшыруының авторы һәм мөхәррире эш дигәндә тәүлекнең теләсә кайсы вакытында теләсә кайсы җиргә очып килеп җитә. “Тугызынчы” модель ВАЗ машинасында булыр ул.

– Нәҗип абый, машинаны да баянда уйнаган кебек оста йөртәсез ахры?

– Оста дип, мин тәртипле йөртүче. Кагыйдәне бик бозмаска тырышам. Дөрес, юл яхшы булганда 140ка да басам инде кайвакыт.

– Тәҗрибәгез зурмы?

– 7 яшьтә әтинең мотоциклын йөртә идем. 70 елларда йөк машиналарында да йөргәләдем. Үземнең беренче машинамны 83 елда алдым. ВАЗ–21013 иде ул. Аннары ике 2106 һәм өч 2109 булды. “Уаз–буханкам” да бар иде.

– “Буханка”? Анысы нәрсәгә?

– Филармониядә эшләгән чакта гастрольгә төркем белән йөрергә кирәк иде. Рульдә һәрвакыт үзем булдым. Ул бик көйсез машина. Сцеплениесыз да кайтырга туры килде.

– Бу “тугызлы”гыз ни хәлдә?

– Аны миңа баҗай сатты. Үзе иномаркага утырды. 30 мең генә йөрелгән иде. Белгән машина булгач, алдым инде. Бәрелмәгән, кырылмаган.

– Сатарга җыенмыйсызмы?

– Уйлап торам. Вакыт инде.

– Нәрсә алмакчы буласыз?

– Хәзер машина алу бер бәла бит, чөнки сайлау мөмкинлеге зур (көлә). Джипка кызыгып йөрим. “Митцубиси Аутландер” яки “Сузуки Гранд Витара” булыр мөгаен.

– Сезгә гаишниклар сәлам биреп каладыр?

– Юк, йөзем таныш булу белән файдаланмаска тырышам. Аннары бит алар арасында да төрле кеше бар. Урыслары мине бөтенләй белми, яшь татар малайлары да танымыйлар. Елга бер–ике штраф эләгә инде.

– Юлда йөргәндә нинди җырлар тыңлыйсыз?

– Минем магнитофон куелмаган. Утыргыч астында йөри. Чөнки берсендә магнитофонымны алырга дип тәрәзәмне ватканнар иде. Шуннан бирле куймыйм. FM радиолары тыңлый алмыйм. Алар миңгерәүләтә. Иң яхшысы рульдә классика тыңлау – ул тынычландыра. Руслардан исә сирәк кенә шансон тыңлый алам.

– Күреп торам, сезнең өчен машинагыз ул эш аты?

– Әйе. “Хозяйственный сумка” дип йөрим мин аны. Багажникта һәрвакыт “дежурный” баяным бар. Банкетка чакырсалар, аппаратура төйим.

– Ерак юлларга еш чыгасызмы?

– Булгалый. Үз гомеремдә рульдә Сочига, Мәскәүгә, Уралга барганым булды. Бер елны баян алырга дип Тулага хәтле барып җиттем.

– Авариягә эләккәнегез юкмы?

– Түбән Камада “Буханка”га автобус килеп керде. Асаф Вәлиев, Алсу Хисамиева, Ядкәр Хәбибуллиннар белән идек. Асафның хәтта бүрекләре очты. Баш авырта дип тә йөрде әле бераз вакыт.

– Карап йөрегез. Алла сакласын.