"Татарстан" радиосында Әмирхан Еникинең “Тауларга карап” әсәре буенча радиоспектакль булачак

Татар әдәбияты классигы Әмирхан Еникинең “Тауларга карап” хикәясе буенча яңа радиоспектакль эфирга чыга. Рольләрне Камал театрыннан Россиянең атказанган, Татарстанның халык артистлары Дания Нурлы, Илдус Әхмәтҗан, Тинчурин театрыннан Татарстанның атказанган артисты Резедә Сәләхова, Артём Пискунов, галим, диктор Фоат Галимуллин, “Татарстан” радиосы хезмәткәре Рамил Һидиятулла башкара.

«Радиоспектакльне «Татарстан» дәүләт телерадиокомпаниясе сайтыннан, «ВКонтакте»дагы төркемдә һәм телеграмда «Татарстан радиосы» каналында уңайлы вакытта һәм урында кабатлап тыңларга, фикерләр калдырырга мөмкин», – журналист, алып баручы Раил Садри.

«Язучы Әмирхан Еникинең «Тауларга» карап әсәрендә кеше рухының бөеклегенә, тормыш сынауларын лаеклы үтүгә, сабырлыкка, яшәешкә дан җырлана. Хикәя Бөек Ватан сугышы чоры прозасы кысаларында каралса да, мәңгелек кыйммәтләрне, кешенең күңел дөньясын тулы итеп чагылдыруы белән үзенчәлекле һәм бүген дә актуальлеген югалтмый», – диде Раил Садри.

Радиоспектакль Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәмендә әзерләнгән.

Зилә Мөбәрәкшина.

Татар информ