13.05.2025 Киңәш-табыш

"Күршеләр умарталык тота, авырлыгы - безгә"

Редакциягә Актаныш районы Иске Теләкәй авылыннан Зөһрә апа шалтыратты:
— Күршеләр күпләп умарта асрый. Ояларын безнең яктагы бакчага күчермәкчеләр. Ирем белән үзем — II һәм III төркем инвалидлары. Улыбызда бал кортына аллергия. “Ашыгыч ярдәм” машинасы чакырткан чакларыбыз да булды, — дип сүз башлады Зөһрә апа. — Район бездән 20 чакрым. Былтыр көчкә алып калдылар.

Аллергия булганын белә торып та, колак салмыйлар. Закон буенча, күршеләрнең умарталары белән безнең өй арасында күпме ара булырга тиеш? Нинди таләпләр бар?

Умарта тотучыларга нинди таләпләр куелган? Күршеләр алардан зыян күргәндә, кая мөрәҗәгать итә ала?

— Россия күләмендә кабул ителгән ветеринария кагыйдәләре бар. Шулар нигезендә, кеше үз ихатасында умарта кортларын тота ала. Бу кагыйдәдә бер таләп бар: койма биеклеге 2 метрдан да ким булмаска тиеш. Әгәр ике арада шундый койма корылган икән, бу кеше куелган таләпләрне үтәгән булып санала, — дип аңлатты “Татарстан умартачылары” төбәк иҗтимагый оешмасы рәисе Шәүкәт Хәйруллин. — Кая мөрәҗәгать итәргә мөмкиннәр дигәндә, бер генә орган да моны тыя алмый. Бу эшләр белән Россельхознадзор, ветеринария идарәләре дә шөгыльләнә. Ләкин алар да килеп карап кына китә ала. Билгеле, ниндидер кимчелекләр табарга мөмкиннәр. Әмма кискен тыю булмаячак. Бер юл кала: судка мөрәҗәгать итү. Суд, умарта кортларын куркынычсыз урынга күчерергә, дигән карар чыгара ала.

Фото: ru.freepik.com

Лилия ЙОСЫПОВА
Ирек мәйданы
№ --- | 13.05.2025