“Яңа әсәрләр”нең өченче китабы чыкты

Татарстан китап нәшриятендә “Яңа әсәрләр”нең өченче китабы басылып чыкты. Бу китапка әдәби конкурсның “Повесть” номинациясендә 1, 2, 3нче урыннарга лаек булган әсәрләр туплап бирелде. Алар – Фирдүс Гыймалтдиновның “Шом”, Марат Әмирхановның “Әлләче, татар-малай!”, Лилия Гыйбадуллинаның “Әлиф ләм мим” әсәрләре.

Әлеге бәйге Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәмендә оештырылды. Ул татар телен саклау һәм үстерү, татар әдәбиятын яңа әсәрләр белән баету, татар язучыларын иҗат итүгә кызыксындыру, татар телендә әдәби әсәрләр иҗат итүче яңа авторларны барлау максатында үткәрелде.