13.05.2025 Фаҗига

Танылган автоблогер, "Илдар Автоподбор"ның дусты 37 яшендә вафат булган

Илдар Сибгатуллин ("Илдар Автоподбор") ютубта бик популяр блог алып бара, аның биш миллион ярым язылучысы бар. Илдар чыгышы белән Нурлат шәһәреннән булып, Мәскәүгә күченгән. Блогер Вячеслав Паруков - Илдарның кулдашы. Аның вафаты турында сөйләп, Илдар социаль челтәрләрдә видео яздырып урнаштырган:

"Март урталарыннан башлап, Вячеслав үзен начар хис итә башлады. Аның хәле бер яхшырды, бер начарланды. Табибларга мөрәҗәгать итүдән баш тартып, үзенең эшен дәвам итәргә тырышты, съемкаларга килде.

Ә инде 4 май көнне туган көнен билгеләп узгач, аның хәле кисәк начарланып, температурасы бик югары күтәрелде. Ул миңа шалтыратырга өлгерде, мин «Ашыгыч ярдәм» чакыртып, янына ташландым. Славаның хәле бик начар булып, аны хастаханәгә алып киттеләр. Аның ике яклы пневмония булуы ачыкланды – үпкәләре 75 процентка эшләмәгән.

Реанимациядә тернәкләнеп, аны хәтта интенсив терапия палатасына күчерделәр. Анда дәвалангач, терелә дә башлаган сыман булды – безгә барыбызга телефоннан шалтыратып чыкты, «Яхшырам, тиздән чыгам», - дип сөендерде. Ә бер атна үтүгә температурасы кисәк күтәрелеп, арабыздан китеп тә барды", - бу сүзләрне Илдар яшьләр аралаш сөйләп бетерде. Күпләрнең яраткан блогы өч көнлек траурга китеп, Слава белән яздырган тагын берничә тапшыру белән дәвам итәчәк.

Саклагыз үзегезне.

---
Матбугат.ру
№ --- | 13.05.2025