12.05.2025 Икътисад

"Kazan Halal Market" ярминкәсендә 10 ил җитештерүчеләре үз продукциясен тәкъдим итәчәк

«Казан Экспо» халыкара күргәзмәләр үзәгендә 2025 елның 13-18 маенда «Россия – Ислам дөньясы: KazanForum 2025» ХVI халыкара икътисадый форумы узачак. Форум кысаларында «Казан» агросәнәгать паркында «Kazan Halal Market» халыкара сәүдә ярминкәсе узачак.

Россиянең иң зур хәләл сәүдә мәйданчыгында ислам дөньясы илләренең әйдәп баручы компанияләреннән тиешле сертификация белән азык-төлек, кием-салым, аксессуарлар, косметика һәм башка товарлар сатып алырга мөмкин булачак.

Быел ярминкәдә Россия Федерациясенең 15 төбәгеннән 150дән артык компания, шул исәптән Әфганстан, Пакистан, Казахстан, Азербәйҗан, Кыргызстан, Төркия, Иран, Һиндстан һәм Сенегал җитештерүчеләре катнаша, шулай ук 40 меңнән артык кеше булыр, дип көтелә.

Хәзерге вакытта Татарстан Республикасында 150дән артык «Хәләл» продукция җитештерүче исәпләнә, шуларның 20гә якыны экспорт юнәлешендә эшли.

Татарстан Республикасында «Хәләл» продукция җитештерү күләме 10,0 млрд. сумнан артып китә, ул ел саен 10%ка артып бара. 2024 елга Татарстан Республикасының «Хәләл» стандарты продукциясе экспорты 14,0 млн. доллар булды, 2023 елга карата үсеш - 21,7%.

Агымдагы елның 4 ае нәтиҗәләре буенча «Хәләл» продукция экспорты 8,0 млн доллардан артык булды, болар - сөт, ит һәм кондитер продукциясе. 2025 елга «Хәләл» продукция экспортлау күләмен 17 млн. долларга җиткерү бурычы куелды.

«Хәләл» продукциянең төп импортерлары: БДБ илләре, Монголия, Бразилия, Гыйрак, Мисыр, Согуд Гарәбстаны, Берләшкән Гарәп Әмирлекләре, Алжир. Алга таба Малайзия һәм Марокко өстәлергә тора.

«Хәләл» юнәлеше буенча төп экспортерлар түбәндәге компанияләр: «Акульчев» (кондитер әйберләре), Эссен-Продакшн (кондитер әйберләре, соуслар), «Агросила» холдингы (ит продукциясе), «Кәүсәрр» АХҖК (ит продукциясе), «ВАМИН-Татарстан» (атланма май, сыр), «MLK-GROUP» ҖЧҖ (СОМ).

Үзара файдалы мөнәсәбәтләр партнерлыкны ныгыта һәм «Экспорт» илкүләм проекты максатларына туры килә.

«Kazan Halal Market» 2025 елның 13 маеннан 18 маена кадәр түбәндәге адрес буенча эшләячәк: Казан шәһәре, Аграр ур., 2 йорт. 8:00 сәгатьтән 19:00 сәгатькә кадәр.

Фото: kazanforum.ru

---
ТР Авыл хуҗалыгы һәм азык-төлек министрлыгы
№ --- | 12.05.2025