06.05.2025 Хәвеф-хәтәр

«Машинаның сул як ишеге эчкә баткан, көпчәгенә зыян килгән...»: сабак алмыйлар һаман

5 май көнне күңелсез хәл килеп чыкты, дөресрәге авариягә эләктек. Гадәттә, ирем эштән соң кайткан көннәрдә юлаучы машина йөртүчеләргә язам. Чөнки Салават Күперенә кайтыр өчен дә ике автобуска утырырга кирәк.

Ә биредә җайлы гына, шул ук бәягә рәхәттә кайтасың. Эштән соң чыктым да, машинаның арткы пассажир утыргычына утырдым. Шунда ук иминлек каешын эләктердем. Никтер "Алла сакласын, әллә ниләр булырга мөмкин бит" дигән уй йөгереп үтте. Юкка булмаган икән. Краснококшайскийга барып җитмәстән, күрше полосадан ягъни сул яктан (безнең шофер автобус полосасыннан җилдерә иде) КаМАЗ безне кысрыклый башлады. Үзе ыжгырып бара. Күрәсең, безнең полосага күчәргә теләгән. Бермәлне китереп бәрмәсенме. Шул вакытта ниләр уйлаганымны хәтерләмим дә. Бәрелү аркасында безнең машина 180 градуска борылды да куйды. Бары могҗиза гына безне җитдирәк зыяннан коткарды. Бәхеткә, әйләнә-тирәдә бер генә машина да юк иде. Югыйсә, шундый тыгымда без башка машинага эләгергә мөмкин идек. Яки мондый бәрелүдән соң, хәтта әйләнеп каплана.

Бәхеткә, тәҗрибәгә ия булган безнең шофер машина белән идарә итүне югалтмыйча, рульне тотып калырга өлгерде. КаМАЗ йөртүчесенә килгәндә, сүзләр җитми. Күрәсең, ул телефоннан аралашкандыр. Югыйсә, бәлки, безнең машинаны күргән булыр иде. Авариядән соң машина эчендә булган өчебез дә бер минут булгандыр тын гына утырдык та, шуннан соң аңга килдек. Урамга чыккач та, КаМАЗ шоферы яныбызга килде. Гафу үтенде. Мин шаккатып: "Шулай йөрергә ярыймы инде?", дип куйдым. Карасак, машинаның сул як тәрәзәсе эчкә баткан, көпчәгенә зыян килгән.

Өйгә ничек кайтып җиткәнемне, чыннан да, хәтерләмим. Гүя томанда, Аллаһы Тәгаләнең рәхмәт фәрештәләре саклагандыр.

Менә шундый очраклардан гыйбрәт алып, тормышның бер мизгел икәнен аңлыйсың һәм төшенәсең.

КаМАЗ, ГАЗель йөртүчеләрнең дуамал, кызу йөртүләренә күпме зар ишеткәнем бар. Ә бит менә шундый аварияләрдән берсе дә сабак алмый. Көн саен зур йөк машиналары катнашындагы юл һәлакәтләре теркәлеп тора. Кызганыч, кайсылары кеше үлеменә дә китерә. Ә болар артында кемнеңдер ашыгуы тора. Зур йөк машинасы уенчык түгел, ләбаса. Руль артына утыргансың икән, син үзең өчен түгел, башкалар иминлеге өчен мең кат җаваплы.

Үзем күпме һәлакәт турында язып, мондый хәлгә юлыгырмын дип башыма да китермәдем. Әмма, чыннан да, бәла аяк астында икән. Беркемне дә аямый ул. Исән-имин булыйк, иң мөһиме, юлда йөрүчеләр җаваплылык турында онытмасын иде.

Лилия ГАЙНУЛЛИНА
Шәһри Казан
№ --- | 06.05.2025