Шашлык пешерүчеләргә 60 мең сумга кадәр штраф яный

Шашлык яратучыларга да, бакчада өмә үткәрергә теләүчеләргә дә сабыр итәргә туры киләчәк. Татарстанда янгынга каршы махсус режим кертелде. Бик вакытлы, ахры: быел республикада урман тирәсендә янгын чыгу очраклары 20 тапкыр арткан.

Татарстанда 14 апрельдән 11 майга кадәр янгынга каршы махсус режим кертелде. Бу хактагы карарны республика Премьер-министры Алексей Песошин имзалады. Шулай итеп, бу чорда учак ягарга, чүп-чар, коры үлән, чыбык-чабык яндырырга ярамый. Моннан тыш урманнарга якын булган торак пунктларда, бакчачылык ширкәтләре, балалар лагерьларында мангалда, янмый торган башка савытта аш-су әзерләү дә тыела. Әлеге чикләүләр ресторан, кафе-барларга, башка җәмәгать туклануы урыннарына кагылмый.

Урманнарда, янгын чыгу куркынычы булган башка урыннарда 1–3 класслы пиротехник эшләнмәләрдән файдаланырга ярамый, дип тә кисәтә коткаручылар. Татарстан буенча Гадәттән тыш хәлләр министрлыгының баш идарәсендә хәбәр итүләренчә, янгынга каршы махсус режим вакытында янгын куркынычсызлыгы кагыйдәләрен үтәмәгән өчен штраф күләме ике тапкыр арта:

– гражданнарга – 10 мең сумнан 20 мең сумга кадәр;

– урындагы затларга – 30 мең сумнан 60 мең сумга кадәр;

– юридик затларга – 400 мең сумнан 800 мең сумга кадәр.

Бу көннәрдә урманчыларга да эш арткан. Алар көчәйтелгән эш режимына күчкән инде. Быелгы кебек иртә яз да үзенекен иткән: Татарстан Урман хуҗалыгы министрлыгының матбугат хезмәтеннән алынган мәгълүматларга караганда, узган елның шушы ук чоры белән чагыштырганда, быел термик нокталар саны – 21 тапкыр, ә янгын чыгу очраклары 20 тапкыр күбрәк теркәлгән.

Ел башыннан бирле республикада 193 термик нокта, урманга якын булган урыннарда 162 янгын чыгу очрагы ачыкланган. Урманчылар әйтүенчә, янгынга каршы махсус режим вакытында урманда янгын куркынычсызлыгы кагыйдәләрен үтәмәүчеләрне тагын да катырак җәза көтә. Гражданнарга – 50 мең сум, урындагы затларга – 90 мең сум, юридик затларга 1 миллион сумга якын штраф яный.