«Йөрәк елый». Олы Әтрәч авылы зиратына бер гаиләне җирләделәр

Тәтеш районының Олы Әтрәч авылы зиратына бер гаиләне җирләделәр. Резедә һәм Фирдүс Юнысовларны соңгы юлга озатырга бөтен район җыелган. Яшь гаиләнең гомере 22 апрельгә каршы төндә өзелгән иде. Инде хәбәр иткәнчә, Апас районында цемент ташучы машина светофор каршында туктап торган җиңел машиналарга килеп бәрелеп, дүрт кеше һәлак булды.

Фирдүс Юнысов Тәтеш районының Олы Әтрәч авылы егете. Күрше Апас районы кызы Резедә белән күптән түгел гаилә корганнар. Олы Әтрәч урта мәктәбе укытучысы Фаяз Миңнуллин Фирдүснең гаиләсе турында да, Резедәнекеләр хакында да бары тик җылы сүзләр генә җиткерде.

– Фирдүс 1996 елгы бала ул. Мине укучым. Әти-әнисе генә түгел, дәү әти-әниләре дә бик хөрмәтле кешеләр. Фирдүснең әтисе баянда уйнап, матур итеп бөтен бәйрәмнәрдә катнаша. Авыл дип яшәүчеләр, актив гаилә. Резедәнең әнисе дә безнең авыл кызы. Алар да бик матур, тату гаилә, – дип сөйли Фаяз Миңнуллин. – Фирдүс белән Резедә башта белем алдылар, карьера ясадылар. Өйләнешкәнче үк Апаста бергә йорт салганнар. Кызганыч, шул өйләрендә матур итеп, озак еллар яшәү насыйп булмаган. Әле дип бәби дә көткәннәр. Бик авыр хәсрәт инде бу. Йөрәк елый. Фаяз Миңнуллин фаҗигага юлыккан икенче машинада ике егет булганын да әйтте.

– СВОдан ялга кайткан Пенза егетләре булган. Аларны да бик кызгандык. Әҗәлнең кая көтәсен беребез дә белми. Язмышлардан узмыш юк шул, – ди ул. Без исә, бу юл фаҗигасында газиз кешеләрен югалткан һәр гаиләнең авыр кайгысын уртаклашабыз.