18.04.2025 Мәдәният

Гөлзадә Сафиуллина: "Җырчыга ялгыз булу җиңелрәк"

Үзенчәлекле баш киемнәре, төрле уен кораллары, фотолар, афишалар, сәхнә костюмнары, китаплар, пластинкалар, балалар бүләк иткән сувенирлар, Аллаһы Тәгаләнең 99 исеме язылган хаҗдан кайткан элмә такта... Татарстанның халык җырчысы Гөлзада Сафиуллинаның студиясе үзенә күрә бер музейны хәтерләтә.

— Гөлзада ханым, сез белгечлегегез буенча мал табибы икән. Ничек җырчы булып киттегез?

— 14 яшемнән әти фермага сыер савучы итеп урнаштырды. Минем бәхетемә, авылыбызда кичке мәктәп ачылды. 4 ел шунда укып, фермада эшләдем. Казан ветеринария институтын тәмамлагач, 3 ел Үзбәкстанда кошчылык фабрикасында хезмәт куйдым. Һөнәремне ярата идем. Ә җырчы буласымны кечкенәдән үк белдем. Җырлау сәләте миңа Аллаһтан бирелгән. Ирем Риф Сафиуллин инженерлыкка укыган. Ул да кечкенәдән артист булырга хыялланган. Үзлегеннән нота грамотасын өйрәнеп, Казан дәүләт консерваториясенә укырга керә, аны тәмамлый. Аңа ияреп, күп нәрсәгә өйрәндем. РСФСРның халык артисты Зөләйха Хисмәтуллинадан дәресләр алдым. Берсендә ул миңа: “Сиңа минем ярдәм бүтән кирәк түгел, оч”, — диде.

— Гаиләдә тату яшәр өчен, ир белән хатынга нинди киңәшләр бирер идегез?

— Җырчы кешегә ялгыз булу җиңелрәк. Җырчыны аңлаган кеше бик сирәк. Ә якын кешең аңламаса, тормыш җәһәннәм белән бер. Үзем оныгым Мурад белән яшим. Аңа 21 яшь. “Кызларга кагылма, кызлар рәнҗеше гомергә. Яраткан кешең белән матур итеп никах укытып, тормыш башларга кирәк”, — дип нәсыйхәтемне бирәм. Тик өйрәтергә ярамый. Бала йомыла гына.

Эльвира МОЗАФФАРОВА
Ирек мәйданы
№ --- | 18.04.2025