Татар зыялылары Тукай каберен зыярәт кылдылар (ФОТО)

Бүген, 15 апрельдә, татар яшәгән һәр җирдә Габдулла Тукайны искә алу чаралары үтә. Мәгълүм булганча, 1913 елда татар шагыйренең йөрәге тибүдән туктый. Быел да, һәр елдагыча, Яңа татар бистәсендәге Татар зиратында Тукай кабере янына зыялылыр җыелды. Быел биредә Казахстан вәкилләре дә бар иде.

Татарстанның халык шагыйре Зиннур Мансуров, нинди генә гамәлләр кылсак та, Тукайга бурычлы булып калачакбыз, диде. Ә кылырга тиешле гамәлләр, чыннан да, бихисап. Зиннур Мансуров әйтүенчә, Тукай белән бәйле урыннарның күбесендә әле дә булса истәлек такталары эленмәгән. Әйтик, хәзерге Тинчурин театры бинасында элек “Новый клуб” эшләгән һәм анда Тукай даими йөргән. Яшел Үзән районы Васильево шифаханәсе территориясендә танылган нәшир, язучы Әхмәтгәрәй Хәсәниләрдән калган кадерле яркәр – бина бар. Хәсәни – Габдулла Тукайның якын дусты, алар “Аң” журналын чыгаруда хезмәттәшлек итә һәм әлеге бина тарихи-мәдәни объект буларак исәптә торса да, бирегә Габдулла Тукай килеп йөрүе турында элмә такта куелмаган. Зиннур Мансуров Тукай үзәге булдыру турында даими әйтеп килә, бу юлы ул “Тукай” теплоходы турында да сүз кузгатты. Кайчандыр Иделдә шундый теплоход йөзгән, хәзер, үзебез җитештерсәк тә, Тукай исемен йөрткән теплоходыбыз юк безнең...

Галим Хатыйп Миңнегулов, күпме вакыт узса да, Тукай бездән алда бара, диде:

– Күпме алга барсак та, Тукай барыбер бездән алда. Чөнки ул халкыбызның символы. Бу халкыбызны яшәтү, аның барлыгын дөньяга таныту, алдагы хәзинәләрне алдагы буыннарга тапшыру дигән сүз. Әмма, Тукай дибез икән, халкыбызны ничек яшәтергә, телебезне ничек сакларга, ничек алдагы буыннарга тапшырырга – шушылар хакында уйланырга, уйланырга гына түгел, без гамәл кылырга бурычлы.  

Россиянең атказанган, Татарстанның халык артисты Георгий Ибушев исә:

– Тукай безнең күңелләрдә, алай гына да түгел, балаларыбызның да, оныкларыбызның да күңелендә булырга тиеш. Шулай булганда Тукаебыз, милләтебез дә беркайчан да югалмаячак, – дип белдерде.

Ә галим, Казахстанның Караганда каласыннан килгән Жанайдар Жумагельдин, без Абай белән, сез Тукай белән бәхетле, диде.

Милләт Тукайлы 139 нчы елын гомер кичерә, шуның 115 елын без “Туган тел”не көйләп яшибез.