08.04.2025 Мәгариф

Башкортстанда татар телен укыткан танылган фән эшлеклесе Бәйнә Сәлимгәрәева вафат

Кайгылы хәбәр: озакка сузылган авырудан соң “Кызыл таң” гәзитенең элекке хезмәткәре, Башкортстан республикасында бик күп укытучыларның остазы Бәйнә Салихҗан кызы Сәлимгәрәева вафат булды.

Бәйнә Сәлимгәрәева 1933 елда Кушнаренко районының Тартыш авылында туган. 1949 елда – Карача-Елга җидееллык мәктәбен, 1952 елда – Кушнаренко педагогия училищесын, 1956 елда Казан дәүләт университетын тәмамлый. 1957 елдан 1962 елга кадәр “Кызыл таң” гәзите редакциясендә эшли. 1962-2000 елларда Башкорт дәүләт университетының татар теле һәм әдәбияты кафедрасында укыта. Филология фәннәре кандидаты, доцент. Төп эшеннән аерылмыйча, 1993-96 елларда Башкорт дәүләт педагогия институтының татар теле һәм әдәбияты кафедрасында да эшли, 2000-06 елларда Башкортстан белемне үстерү институтында укыта. Ул, шулай ук, студентларның татар теле һәм әдәбияты буенча педагогик практикасының алыштыргысыз методисты булды.

Бәйнә Салихҗан кызы – татар телен укыту методикасы буенча берничә китап авторы, Башкортстан мәктәпләре өчен урындагы материаллар нигезендә 1-11нче сыйныфлар өчен дәреслекләр авторлары коллективының гыйльми җитәкчесе, Ф. Гафурова белән берлектә икенче, өченче, дүртенче сыйныфлар өчен дәреслекләр авторы. Ул – Башкортстан Республикасының мәгариф отличнигы.

Бәйнә апа студентларга икенче әни ролен үтәгән мөгаллимә булды. Чын хатын-кызларга гына хас зыялы, затлы, зәвыклы, сабыр холыклы, бәрхет тавышлы апабызны күпләр бүген дә рәхмәт белән искә ала. Безгә, әле генә авылдан килгән балаларга, акыллы киңәшләр бирүче, авыр вакытларда җылы сүзләр белән юатучы остаз булды ул.

Бәйнә Сәлимгәрәеваның туганнарының, якыннарының авыр кайгысын уртаклашабыз. Урыны җәннәттә, рухы шат булсын. Тыныч йокла, остазыбыз! - lдип яза “Кызыл таң” газетасы.

Резеда Галикәева

---
Матбугат.ру
№ --- | 08.04.2025