20.03.2025 Мәдәният

Рузия Мотыйгуллина: “Апам икенче әнием кебек булды”

Күптән түгел Татарстанның халык, Россиянең атказанган артисткасы Рузия Мотыйгуллинага 75 яшь тулды. Ул бер дә үзгәрми: әйтерсең еллар аны әйләнеп уза.

— Рузия апа, сезгә һич кенә дә үз яшегезне биреп булмый. Әле һаман машина йөртәсез... Моның сере нәрсәдә икән?

— Үземә карата шактый игътибарлы мин: ашауны контрольдә тотам, атнага бер-ике тапкыр бассейнда йөзәм. Машина йөртүгә килгәндә, 30 елдан артык рульдә инде. Җәяү йөрүгә караганда, машинада үземне рәхәтрәк сизәм.

— Сәхнә юлын сайлавыгызда бертуган апагыз Исламия Мәхмүтованың өлеше зурмы?

— Зур дип уйлыйм. Авылга килгән бер генә спектакльне дә калдырмый идем. Апа күчмә театрда эшли башлагач, театрга йөрүләр тагын да ешайды. Дөрес, театр юлын сайлавымны җизнәм Хәлил абый башта бик өнәп бетермәде. “И, сеңлем, сиңа нәрсәгә кирәк инде бу?” — диде. Алар бит күчмә театрда эшләп, күпме газап белән гастрольләрдә йөргән артистлар. Ул чагындагы күчмә театр артистларына һәйкәл куярлык!

Җиде ел Исламия апаларда яшәдем. Хәтта Камал театрына эшкә урнашкач та, алар мине үзләре яныннан җибәрмәде. Югыйсә яшәргә торак та бирделәр. Хәлил абый мине үз сеңлесе кебек кабул итте, аны икенче әтием дип йөртәм. Ә Исламия апа икенче әнием кебек булды: иркәләп, кадерләп тоттылар. Әле аннан киткәч тә, җизни апага: “Бу тәмле ризыкны калдырыйк әле, Рузия кереп чыкмасмы”, — ди торган булган...

Руфия РӘХМӘТУЛЛИНА
Ирек мәйданы
№ --- | 20.03.2025