Ташкентта Татарстан киносы көннәре узды (ФОТО)

Узган атнада Үзбәкстанда “Татарстан киносы көннәре” гөрләде. Бу уңайдан “Татаркино”ның директоры Миләүшә Айтуганова җитәкчелегендәге делегация Ташкетка барып кайтты.

Ташкентның Милли кино сараенда тамашачыларга дүрт көн дәвамында “Гашыйклар тавы” (режиссеры – Салават Юзиев), “Телсез күке” (режиссеры – Рәүф Кубаев), “Мин киләм” (режиссеры – Булат Сабитов) дигән яңарак төшерелгән нәфис фильмнар һәм халык күптән яратып караган “Әпипә” (режиссеры – Илшат Рәхимбай) музыкаль комедиясе тәкъдим ителде.

Ташкент тамашачыларына “Телсез күке” премьерасын күрсәткәндә, залда кино сәнгатендә беренче адымнарын ясаучы Сәидә Мөхәммәтҗанова да бар иде. Тамаша башланыр алдыннан ул татар халкының “Озату” дигән җырын башкарды.

Үзбәкстан белән Татарстан арасындагы кино дуслыгы 2018 елдан бирле дәвам итә. Шул вакытлардан бирле Татарстан кинолары даими рәвештә Үзбәкстан буйлап сәяхәт итә, ә үзбәк кинолары Казанда күрсәтелә.

Тиздән икенче татар-үзбәк кинопроекты старт алачак. Дин галиме, мәгрифәтче, тарихчы Шиһабетдин Мәрҗанигә багышланган “Мөгаллим” дигән фильм төшерелә башлаячак.

Беренче уртак кинопроект кысасында 2019 елда Зифа Кадыйрованың “Сагынырсың – мин булмам” әсәре буенча “Сөмбел” дигән нәфис фильм төшерелгән иде.