Гөлназ Асаева “Татар җыры”ннан соң тавыш чыгарган

Чараны алып баручы фикеренчә, Гөлназ үзен болай тотарга тиеш түгел иде. Башкортстанның атказанган артисты, Татарстанда танылган җырчы Гөлназ Асаева Уфада узган “Татар җыры” фестивален оештырудан канәгатьсез калган. Аның әйтүенчә, чара матур гына узса да, күңелсез хәл булган: алып баручы сәхнәгә чакырганда, аның мактаулы исемен: 3 ай элек алган “атказанган артист” исемен атамаган.

Бу хәл Гөлназга ошамаган һәм ул шундук социаль челтәрләрдә үзенең канәгатьсезлеген белдергән, дип яза “KazanFirst”.

– Артистны көлеп игълан итү – “төпкә егылып төшү”. Аеруча шундый дәрәҗәле чарада. Аларның үз-үзен тотышы, сөйләү рәвеше – барысы да әзерлексез чыгулары турында сөйли. “Татар җыры” дәрәҗәсендәге чара “банкет мәзәкләре” белән чуарланмаска тиеш”, – дип билгеләп үткән ул һәм үз чыгышын игълан иткән алып баручыны, “банкет алып баручы”, дип кимсеткән.

“Гөлназ моңа кадәр безгә чит түгел… иде. Аны үзем чакырдым – тагын бер тапкыр чакырыйм әле, дип уйладым… Үз башыма чакырганмын. “Атказанган” дип әйтергә ярамадымы әллә”, дип сөйләнеп сәхнәгә чыгуына гаҗәпләндем, – дигән чараны алып баручы Айрат Ильясов. – Шуннан соң ул миңа хәбәрләр язып җибәрде. Мин исә: “Синең фанатың түгелмен, нинди исемнәргә ия булуыңны, нәрсәләр эшләвеңне каян белим? – дип җавап бирдем. “Нәрсәдер әйтергә телисең икән, кил дә әйт. Әмма мондый тавыш чыгарырга… Ярый, үзе дә аңлар, бәлки”, – дип язган ул тыелган социаль челтәрдәге аккаунтында.