12.02.2025 Хәвеф-хәтәр

Бүген 300ләп балыкчы аерылган бозда йөзеп йөри - ел саен шушы хәл

Сахалинның көньягында 300 балыкчы белән боз кисәге ярдан аерылган, кешеләрне Охот диңгезенә алып киткән. Бу бозда барлыкка килгән гаять зур ярык аркасында килеп чыккан.

"12 февраль көнне көндез Гадәттән тыш хәлләр министрлыгының кризислы хәлләр идарәсе үзәгенә Корсаков районында Мальки авылыннан Долинка елгасы тамагына кадәр киңлеге 10 метрга кадәр, ярдан 2,5 чакрым ераклыкта ярык барлыкка килүе турында хәбәр килде. Беренчел мәгълүматлар буенча, бозда 300 гә якын һәвәскәр балыкчы бар”, – дип хәбәр итәләр төбәк Гадәттән тыш хәлләр министрлыгында.

Билгеле булганча, һәлакәт урынына коткаручылар һәм дәүләт инспекциясе хезмәткәрләрен көймәләре белән җибәргәннәр. Коткару операциясендә “Хивус” һава мендәрендәге судносын кулланачаклар. Шулай ук балыкчыларны коткару өчен Ми-8 вертолеты вакыйга урынына очкан.

Телеграм-каналларда таралган видеоязмалардан күренүенчә, ярдагы балыкчылар бозда аерылып коллегаларын кармаклар, җепләр һәм леска ярдәмендә коткарырга тырыша. Бозда йөзеп йөргән балыкчылар күңелләрен төшерми, алар җырлыйлар. Ә кайсыбер экстрим яратучылар, тоткан балыкны һәм балык тоту кирәк-яракларын югалтмас өчен хәтта вертолетта эвакуациядән баш тарталар. SHOT Telegram-каналы мәгълүматы буенча, әлегә 100дән артык балыкчыны коткарганнар.

Бу балыкчыларга хәйран калырлык инде. Ел саен (!) алар шулай бозда аерылып йөзеп китә. Ел саен! Аларны коткарыр өчен күпме көч һәм акча җәлеп ителә. Ә кем белә, бәлки, нәкъ шул моментта коткаручылар да, аларның вертолётлары да чыннан очраклы бәлагә юлыккан берәрсенә ныграк кирәктер?

Фото:Shot Telegram-каналы видеосыннан скриншот.

Әлфия ШАКИРҖАНОВА
Өмет
№ --- | 12.02.2025